पर्वत, २ साउन
राष्ट्रिय प्राथमिकताप्राप्त आयोजनाका रुपमा चिनिएको कालीगण्डकी प्रसारण लाइनको कुश्मा–बुटवल बितरण लाइनले यतिबेला फलेवास–६ देविस्थान र बिशेषगरि फलेवास नगरपालिकालाई नै टाउको दुखाइको विषय बनेको छ । फलेवासले केहि वर्ष अघिदेखि ‘नगरको गौरव’ को आयोजनाका रुपमा निर्माण गरिरहेको फलेवास रङ्गशालालाई ठीक बिचभागमा पर्नेगरि २२० केभिका टावर निर्माण गर्न लागेपछि देविस्थानबासी नागरिक र फलेवास नगरपालिका नै त्यसको बिरोधमा उत्रिएका छन् । आयोजनाका तीनवटा टावर निर्माण गर्दा नगरकै गौरवका रुपमा रहेको रङ्गशाला, निर्माणाधिन बसपार्क र दुईवटा विद्यालयमा समेत असर पर्ने भएकोले कुनै पनि हालतमा उक्त टावर बैकल्पिक बाटोबाट लैजान फलेवासबासीले दबाब दिने चेतावनी दिएका छन् ।
कालीगण्डकी करिडोर प्रसारण आयोजनाकोे कुश्मा–बुटवल खण्ड बिस्तारको लाइन सार्न माग गर्दै केहि महिनादेखि नै फलेवासको देविस्थानबासी आन्दोलनमा छन् । नगरकै गौरवका रुपमा निर्माणाधिन फलेवास रङ्गशालाको माथिबाट लाइन बिस्तार गर्दा रङ्गशाला नै बिस्थापित हुने भन्दै देविस्थानबासी र समग्र फलेवासका जनप्रतिनिधि समेतले आयोजनाको बिरोधमा उत्रिएका हुन् । आयोजनापक्षले एकतर्फि रुपमा पेलेर अघि बढ्न खोजेको भन्दै आइतबार सर्वदलिय बैठक बसेका फलेवासका राजनीतिक दल, नगरप्रमुख, उपप्रमुख लगायतले जिल्ला प्रशासनले समेत आयोजनाकै पक्षमा निर्णय गरेको भन्दै प्रशासनको समेत बिरोध गरे । बैठकले गत १६ असारमा प्रमुख जिल्ला अधिकारी नारायण प्रसाद सापकोटाको अध्यक्षतामा बसेको बैठकमा सिडिओले समेत देविस्थानबासीको मर्म नबुझि सामन्ति शैलिमा आयोजनाको पक्षमा निर्णय गरेको भन्दै निर्मम भएर सिडिओ र प्रशासनको समेत बिरोध गर्ने चेतावनी दिएका छन् ।
खुर्कोटदेखि बुटवलसम्मका दुई सय ३३ मध्ये २३० टावर निर्माण भइसकेको आयोजनाले जनाएको छ । देविस्थानबासीले एपी १० ए, एपी १० बी र एपी ११ गरि तीनवटा टावर निर्माणका क्रममा बिरोध जनाएको आयोजनाप्रमुख चन्दनकुमार घोषले बताए । आयोजनाप्रमुख चन्दनकुमार घोषले कुनै हालतमा टावर अन्यत्र सार्न नमिल्ने दाबी गरेका छन् ।
आयोजनाको खुर्कोट–बुटवल प्रसारण लाइन २२० केभिए क्षमताको हो । सोहि आयोजनाको पहिलो खण्ड दाना–खुर्कोट अघिल्लो वर्षको माघमै सम्पन्न भइसकेको छ । २२० केभिएको ८८ किलोमिटर लामो लाइनमार्फत बुटवल जोड्ने कार्यक्रम छ । दानादेखि खुर्कोट सम्मको लाइनमा ५०० मेगावाट र खुर्कोटदेखि बुटवल सम्मको प्रसारण लाइनमा १५ सय मेगावाटसम्म विद्युत प्रसारण क्षमता रहेको आयोजनाले जनाएको छ ।
यसै विषयमा सोमबार फलेवासका नगरप्रमुख गंगाधर तिवारी र प्रमुख जिल्ला अधिकारी नारायणप्रसाद सापकोटाबिच कुराकानी भएको छ । जिल्ला प्रशासनमा भएको छलफलमा प्रजिअ सापकोटाले उक्त आयोजनाको काम एलाइनमेण्ट अनुसार नै गर्न सहयोग गर्नुपर्ने बताएका थिए । तर, नगरप्रमुख तिवारीले देविस्थान र फलेवासबासीले कुनै पनि हालतमा उक्त स्थानमा टावर निर्माण गर्न नदिने भएकोले बैकल्पिक बाटोबाट लाइन बिस्तार गर्न अनुरोध गरेको बताए । ‘मैले फलेबासबासी जनताको चाहना बिपरित काम हुन दिन्न,’ तिवारीले भने, ‘नगरकै गौरवको आयोजनालाई असर पर्नेगरि लाइन बिस्तार गर्नखोजे अप्रिय घटना घट्नसक्ने र त्यसको जिम्मेवारी प्रशासन र आयोजनाले लिनुपर्छ भनेका्े छु ।’ फलेवास नगरपालिका र नगरबासी जनता विकासबिरोधि नभएको भन्दै तिवारीले विकल्प हुँदाहुँदै विकासका नाममा गाउँ नै बिस्थापित गर्नेगरि अघि बढ्जन नहुने बताए ।
