Featured News

बैशाख १ , पोखरा – पोखरा महानगरपालिका वडा नम्बर २२ पुम्दीभुम्दीको ठूलीबिडीमा सोमबार साँझ यात्रुवाहक बसमा आगलागी भएको छ । कास्की प्रहरीका अनुसार बसको वायरिङ सट भई आगलागी भएको हो । बागलुङ बसपार्कबाट स्याङ्जाको वालिङका लागि छुटेको बस पुम्दीभुम्दी पुगेपछि एक्कासि आगो लागेको थियो । आगलागी सुरु भएपछि चालक र सहचालकले तत्काल बस रोकेर यात्रुहरूलाई बाहिर निकालेका थिए ।

बसमा सवार करिब ४० जना यात्रु सकुशल रहेको जिल्ला प्रहरी कार्यालय कास्कीका डीएसपी हरिबहादुर बस्नेतले जानकारी दिनुभयो । बसमा आगो लागेपछि स्थानीयवासी र प्रहरीको सहयोगमा नियन्त्रणको प्रयास गरिएको थियो । तर, आगो तीव्र रूपमा फैलिँदा बस पूर्णरूपमा जलेर नष्ट भएको प्रहरीले जनाएको छ । घटनास्थलमा पुगेको प्रहरी टोलीले आगो नियन्त्रणमा लिएको थियो । घटनाबाट मानवीय क्षति नभए पनि बसमा ठूलो भौतिक क्षति पुगेको छ । प्रहरीले घटनाको थप अनुसन्धान भइरहेको र आगलागीको यथार्थ कारणबारे प्राविधिक परीक्षणपछि मात्र पुष्टि हुने जनाएको छ । अहिले भने प्रारम्भिक रूपमा विद्युत् सर्ट (वायरिङ सट) नै आगलागीको मुख्य कारण हुन सक्ने अनुमान गरिएको छ ।

बैशाख १ , पोखरा – आजदेखि विक्रम संवत् २०८३ शुरू भएको छ । नयाँ वर्षलाई उत्साह, नयाँ उमङ्ग र नयाँ सुरुआतका रूपमा लिने गरिन्छ । वैशाख १ गते वर्षको पहिलो दिन देशभर एकआपसमा शुभकामना आदानप्रदान गरी हर्षोल्लासका साथ मनाइँदैछ ।

सबैभन्दा पुरानो संवतका रूपमा स्थापित विक्रम संवत् अन्तर्गत नेपालमा वैशाख १ गतेलाई नयाँ वर्षका रूपमा मनाइँदै आइएको छ । आज सूर्यले मीन राशिको भोग समाप्त गरी मेष राशिबाट भोग शुरू गर्ने दिन अर्थात् मेष सङ्क्रान्ति पनि हो ।

सूर्यको गतिसँग आधारित भएकाले यो संवत् शाश्वत तथा वैज्ञानिक रहेको विद्वानहरूको भनाइ छ । हरेक व्यक्तिले गएको वर्षका सफलता–असफलताको मूल्याङ्कन गरी नयाँ सङ्कल्पसहित अघि बढ्ने चलन छ ।

बिहानै नुहाउने, घरआँगन सफा गर्ने, मठमन्दिरमा पूजाआजा गर्ने र साथीसङ्गी तथा इष्टमित्रसँग शुभकामना आदानप्रदान गर्ने परम्परा आज देशभर नै मनाइन्छ । भक्तपुरमा बिस्का जात्रा र तराईमा सहलेश फूल फूल्ने विशेषता पनि यही दिनसँग जोडिएको छ ।

नयाँ वर्षको अवसरमा राष्ट्रपति रामचन्द्र पौडेल, उपराष्ट्रपति रामसहायप्रसाद यादवलगायत विशिष्ट व्यक्तित्वले नेपालीको उन्नति, प्रगति र समृद्धिको शुभकामना दिनुभएको छ ।

चैत्र ३० , पोखरा – पोखराको लेकसाइडमा २१औँ संस्करणको फेवा नववर्ष महोत्सव शुरु भएको छ । पर्यटन, संस्कृति र खानालाई प्रवद्र्धन गर्दै आन्तरिक पर्यटनको विकासको लक्ष्यका साथ हिजोदेखि महोत्सव शुरु भएको हो ।

महोत्सव भोलिसम्म चल्ने आयोजक होटेल सङ्घ पोखराका अध्यक्ष लक्ष्मण सुवेदीले जानकारी दिनुभयो । महोत्सव उद्घाटनका अवसरमा सातै प्रदेशका सांस्कृतिक नाचहरू प्रस्तुत गरिएको थियो ।

आज खहरेबाट दुलही लिन अम्बोट पुग्ने गरी पञ्चैबाजाको रमाइलो प्रतियोगिता राखिएको छ । यसमा १५ पञ्चैबाजा समूहले भाग लिएको अध्यक्ष सुवेदीले बताउनुभयो । लेकसाइडका सेन्टर प्वाइन्ट, गौरीघाट र अम्बोटका हरेक चौतारामा सांस्कृतिक कार्यक्रम र पञ्चै बाजा प्रतियोगिताका क्रममा खहरेमा रत्यौलीको कार्यक्रम पनि समावेश हुने उहाँले जानकारी दिनुभयो ।

पर्यटक दौड प्रतियोगिता पनि महोत्सवमा समावेश हुने सङ्घले जनाएको छ ।

चैत्र २९, पोखरा – काठमाण्डौ उपत्यकासहित देशका धेरै ठाउँमा यतिबेलाको मौसम सफा छ ।

दिउँसोपछि केही ठाउँमा मेघगर्जन, चट्याङ र हावाहुरीसहित वर्षा र हिमपातको सम्भावना रहेको मौसम पूर्वानुमान महाशाखाले जनाएको छ ।
महाशाखाका अनुसार आज कोशी प्रदेशको पहाडी र हिमाली भू-भाग लगातय बाँकी हिमाली भू-भागमा साधारणतया बादल लाग्ने, कोशी प्रदेशको तराईमा तथा बाँकी पहाडी भू-भागमा आंशिक बादल लाग्ने र तराई भू-भागमा मौसम मूख्यतया सफा रहनेछ ।

कोशी प्रदेशको पहाडी र हिमाली भू-भाग लगायत बागमती र गण्डकी प्रदेशको हिमाली भू-भागका थोरै ठाउँहरूमा र बाँकी हिमाली तथा गण्डकी प्रदेशका पहाडी भू-भागका एक/दुई ठाउँमा मेघगर्जन र चट्याङ्गसहित हल्का वर्षा र हिमपातको सम्भावना रहेको छ ।

लुम्बिनी र सुदूरपश्चिम प्रदेशको तराई भू-भागका थोरै ठाउँहरूमा हावाहुरीको समेत सम्भावना रहेको छ ।

चैत २७ , पाेखरा – पोखराको सभागृह चोकमा भएको महिलाको हत्या आफ्नै भान्जाले गरेको खुलेको छ । जिल्ला प्रहरी कार्यालय कास्कीले शुक्रबार पत्रकार सम्मेलनमार्फत यो जानकारी दिदै मुख्य अभियुक्त र उनका मतियारलाई सार्वजनिक गरेको हो ।

गत बुधवार साँझ सवा ७ बजेको समयमा पोखरा-५ मालेपाटन बस्ने ४२ वर्षीया सिर्जना पौडेल केसीको धारिलो हतियार प्रहार गरी हत्या भएको थियो । उनलाई धारिलो हतियार प्रहार गर्ने उनकै भान्जा पर्वतको कुश्मा नगरपालिका–११ सिल्मीका २७ वर्षीय सन्तोष भन्ने शिशिर केसी रहेको प्रहरी उपरीक्षक नविन कार्कीले बताउनुभयाे । सोही हत्या काण्डमा संलग्न पोखरा १७ रातोपैह्रोका ३२ वर्षीय कुशल परियारलाई पनि प्रहरीले पक्राउ गरी सार्वजनिक गरेको हो ।

शिशिरलाई बुटवलबाट विहीबार र परियारलाई पोखराबाट आजै शुक्रबार पक्राउ गरिएको हो । उनीहरुले हत्यामा प्रयोग गरेको ग२५ प ३०४४ नम्बरको स्कुटर पोखराकै मुस्ताङचोकबाट र धारिलो हतियार खुँडा पोखरा–१७ तितेपानीको जंगलमा फेला परेको प्रहरीले जनाएको छ । ‘प्रारम्भिक अनुसन्धानका क्रममा घरपरिवारमा भएको बेमेल, अंशमुद्धाका कारण हत्या गरेको देखिन्छ’, कास्की प्रहरी प्रमुख नविन कार्कीले भन्नुभयाे , ‘घटनामा अरु पनि संलग्न रहेको आशंकामा आधा दर्जन जतिलाई सोधपुछ गरेका छौ । अन्य पनि तानिन सक्छन् ।’

शिशिरले परियारलाई मलाई एउटा काममा सहयोग गर्नुपर्यो पैसा दिन्छु भनेर स्कुटर चलाउन लगाएका थिए । प्रहरीका अनुसार शिशिरले साह्रै ईगो साँधेर एकदिन मार्छु भनेर भन्दै आएको र १ महिना अघिबाट मार्ने योजना बनाएका थिए । घटना हुने दिन पनि सर्टर बन्द भएको र उज्यालो कम भएको बेला पारेको कार्कीले बताउनुभयाे । प्रहरीले दिउँसै बोरामा खुँडा बोकेको, स्कुटर चढेको लगायत घटना हुने बेला अभियुक्तहरुले लगाएका कपडासमेत सार्वजनिक गरेको छ ।

सिर्जनाले कास्की जिल्ला अदालतबाट बकसपत्र सम्बन्धी मुद्दा जितेर पतिको अंश भोग गरेकी थिइन् । तर, उनीबाट सम्पत्ति फिर्ता गराउन पतितर्फका आफन्त सक्रिय थिए । पोखरा उपमहानगरपालिका-५ मा बस्ने सिर्जनाको पृथ्वीचोकमा जुत्ता पसल थियो । मालेपाटनका कृष्ण केसीसँग उनको चार वर्षअघि विवाह भएको थियो । जेठी पत्नीले विष सेवन गरी आत्महत्या गरेपछि सिर्जनासँग विवाह गरेका थिए ।

विवाहपछि एक छोरीको जन्म भएको थियो । अहिले छोरी तीन वर्षकी भइन् । कृष्णको निधन दुई वर्षअघि भएको थियो । कृष्णको जेठीतर्फका छोरा लागुऔषध मुद्दामा कास्की जिल्ला कारागारमा कैद छन् । पतिको निधनपछि परिवारमा अंशको किचलो शुरु भएको थियो ।

चैत्र २७ , पोखरा – चैत्र २७ , पोखरा–मुग्लिन सडकको सेती पुलदेखि तनहुँको जामुनेसम्म विस्तार भइरहेको सडक आयोजनाले उल्लेखनीय गति लिएको छ। हालसम्म कुल काममध्ये करिब ७७ प्रतिशत भौतिक प्रगति र ६२ प्रतिशत वित्तीय प्रगति सम्पन्न भएको आयोजना कार्यालयले जनाएको छ।३८.७१ किलोमिटर लामो सडकखण्डमध्ये ३७.२८ किमीमा कालोपत्र भइसकेको छ भने सर्विस लेन निर्माण पनि तीव्र रूपमा अघि बढिरहेको छ। यस वर्षमात्र ३३.७८ किमीमा अस्फाल्ट प्रविधिबाट दोस्रो तहको कालोपत्र भएको हो । कुल ३६.३२ किमीको सर्विस लेनमा झन्डै ५० प्रतिशत काम सम्पन्न भएको छ । दोस्रो चरणको कालोपत्र ९६.३ प्रतिशत सम्पन्न भएको हो ।

सडक खण्डमा १३ मध्ये १२ वटा पुल निर्माण सम्पन्न भइसकेका छन्, भने सेती पुल ‘केबल–स्टेड’ प्रविधिमा आकर्षक डिजाइनसहित निर्माण भइरहेको छ । आयोजना कार्यालयका अनुसार सेती पुलको भौतिक प्रगति ५८.३७ प्रतिशत पुगेको छ । पुल निर्माणका लागि गरिएको ठेक्काको सम्झौता अवधि गत भदौमा सकिएपछि आगामी वैशाखसम्म म्याद थप भएको छ ।
हाल सडकमा ‘रोड मार्किङ’, ‘सेफ्टी ब्यारीअर’ जडान तथा बाँकी कालोपत्रका काम भइरहेका छन्। चार लेन र छ लेन गरी सडक विस्तार भइरहेको यस आयोजनाले यस वर्ष उल्लेखनीय प्रगति हासिल गरेको योजना प्रमुख, इन्जिनियर कृष्णबहादुर कुँवरले बताए । चार लेन सडकतर्फ पोखरा विश्वविद्यालय अगाडिको क्षेत्रमा एक सय मिटर तथा विजयपुर पुल आसपासमा चार सय मिटरमात्र कालोपत्र गर्न बाँकी रहेको कुँवरको भनाइ छ ।

यस खण्डमा सडक विस्तार तथा स्तरोन्नतिको काम चिनियाँ निर्माण कम्पनी यनहुई काइयुयान हाइवे एन्ड ब्रिज कन्सट्रक्सनले गरिरहेको छ ।

चैत २६ पाेखरा – पोखरामा बुधबार साँझ एक महिलामाथि धारिलो हतियार प्रहार गरी हत्या भएको छ।

साँझ करिब ७ बजेतिर सभागृहचोक अगाडि सडकपेटीमा उभिरहेकी महिलामाथि एक युवकले पछाडिबाट आक्रमण गरेको प्रत्यक्षदर्शीहरूले बताएका छन्। हतियार प्रहारपछि उनी गम्भीर घाइते भई ढलेकी थिइन्।

घटनापछि उनलाई उपचारका लागि गण्डकी मेडिकल कलेज लगिएको थियो। उपचारकै क्रममा चिकित्सकले मृत घोषणा गरेका हुन्।

मृतक पोखरा–५ मालेपाटनकी ४२ वर्षीया सिर्जना पौडेल क्षेत्री रहेको प्रहरीले जनाएको छ।

क्षेत्री सभागृहचोकबाट शिवालयचोकतर्फ जाने सडकखण्डको छेउमा उभिरहेकै अवस्थामा आक्रमणमा परेकी थिइन्।

प्रहरीका अनुसार आक्रमणमा संलग्न व्यक्ति मोटरसाइकलमा भागेको प्रारम्भिक जानकारी आएको छ।

जिल्ला प्रहरी कार्यालय कास्कीले घटनामा संलग्न व्यक्तिको खोजी कार्य जारी रहेको र घटनाको विस्तृत अनुसन्धान भइरहेको जनाएको छ।

चैत २६ पाेखरा- ललितपुर पाटनको कृष्ण मन्दिर परिसरमा हिजो चक्कु प्रहार गरेर दाजुभाइको हत्या भएको छ । चक्कु प्रहारबाट ३३ वर्षीय सुमित नेम्बाङ र उहाँका भाइ २६ वर्षीय सिर्जन नेम्बाङको ज्यान गएको ललितपुर प्रहरीले जनाएको छ ।

प्रहरीका अनुसार चक्कु प्रहारबाट गम्भीर घाइते भएका उनीहरूको बीएन्डबी अस्पतालमा उपचारको क्रममा ज्यान गएको हो । चक्कु प्रहार गर्ने सञ्जीव नेपालीसहित ५ जनालाई प्रहरीले भाग्दै गरेको अवस्थामा पक्राउ गरेको छ ।

प्रहरीका अनुसार हिजो बेलुकी नेम्बाङ दाजुभाइले कुनै नम्बरमा फोन गर्ने क्रममा झुक्किएर सञ्जीवको मोबाइलमा पुगेको थियो । नचिनेको नम्बरबाट फोन आएपछि शुरूमा केहीबेर सामान्य कुराकानी भए पनि पछि फोनमै विवाद बढ्दै गएपछि सञ्जीवले नेम्बाङ दाजुभाइलाई पाटन बोलाएका थिए ।

इमाडोलबाट उनीहरू पाटन पुगेलगत्तै मासु पसलमा काम गर्ने सञ्जीवले मासु काट्न प्रयोग हुने हतियारले प्रहार गरेको ललितपुर प्रहरीले जनाएको छ ।