पालिका खबर

कार्तिक २७ , पोखरा – कात्तिक शुक्ल एकादशीका दिन भगवान विष्णुको प्रतीकका रुपमा तुलसीको दामोदरसँग विवाह र विशेष पूजा गरी हरिबोधनी एकादशी पर्व आज मङ्गलबार देशभर मनाइएको छ । हरिबोधनी एकादशीलाई ठूलो एकादशी पनि भन्ने गरिन्छ । ठूलो एकादशीको अवसर पारेर कास्कीको पोखरा महानगरपालिका वडा नं. ९ तुलसी घाटमा निर्माण गरिएको गणेश मन्दिर, १०८ शिवलिङ्ग र ढुङ्गेधारा (हिंटी) उद्‌घाटन गरिएको छ ।

तुलसी घाटमा आयोजित तुलसी विवाह एवम् हरिबोधनी एकादशी मेलाको अवसर पारेर पोखरा महानगरपालिका वडा नं. ९ को सहयोगमा नयाँबजार रामघाट धार्मिक क्षेत्र विकास समितिले निर्माण गरेको संरचना उद्‌घाटन गरिएको हो । गणेश मन्दिर, १०८ शिवलिङ्ग र ढुङ्गेधाराको पोखरा ९ का वडा अध्यक्ष दिपेन्द्र मर्सानीले उद्‌घाटन गर्नुभएको हो । नयाँबजारबाट तुलसी घाटसम्म जानका लागि यसअघि नै वडा कार्यलयले प्रवेशद्वार, सिढीयुक्त बाटो बनाइसकेको छ । संरचना उद्‌घाटन समारोहमा बोल्दै अध्यक्ष मर्सानीले तुलसी घाटलाई सौन्दर्यकरण गरि धार्मिक पर्यटकको गन्तव्यका रुपमा विकास गर्नुका साथै परम्परा र संस्कृति संरक्षणका लागि वडा कार्यलयले यस प्रकारका संरचना निर्माणमा सहयोग गर्दै आएको बताउनुभयो ।

कार्यक्रममा पोखरा महानगरपालिका वडा नं. ९ का जनप्रतिनिधिहरू, नेवाः खलः कास्कीका अध्यक्ष अशोक पालिखे, नयाँबजार नेवा मिसा पुचःका अध्यक्ष यमुना तझ्या, नेवा पत्रकार पुचः कास्कीका अध्यक्ष अनिशा श्रेष्ठ, स्थानीय टोल विकास संस्थाका अध्यक्ष तथा प्रतिनिधि लगायत स्थानीय व्यक्तिहरूको उपस्थिति रहेको थियो । संरचना उद्घाटनसँगै आज सेती नदि किनारमा रहेको तुलसी घाटमा फूलको डोली तारिएको थियो । हरिबोधनी एकादशीको दिन आज सेती किनारमा तोरण तार्ने, स्नान, दान र भजन कीर्तन, नाचगान गर्ने मानिसहरूको घुँइचो लागेको थियो ।

कार्तिक २०,पोखरा – अर्घाखाँचीको भूमिकास्थान नगरपालिकामा हिजो भएको बस दुर्घटनामा घाइते भएका ३५ जनाको उपचार चल्दैछ । भूमिकास्थान नगरपालिका वडा नम्बर ५ र ६ को सिमाना जयठाटीमा हिजो बेलुका देउसी भैलो नाचिरहेको ठाउँमा बस दुर्घटना भएको हो ।

दुर्घटनामा भूमिकास्थान नगरपालिका १ ढाकाबाङ्गकी ७० वर्षीया रुनी खनालको घटनास्थलमै र २२ वर्षीय तारा श्रेष्ठको अर्घाखाँची अस्पतालमा उपचारको क्रममा ज्यान गएको थियो ।

दुर्घटनामा गम्भीर घाइते १० जनालाई थप उपचारको लागि लुम्बिनी प्रादेशिक अस्पताल बुटवल रिफर गरिएको अर्घाखाँची अस्पतालका निमित्त प्रमुख डा.अशोक शाहले बताउनुभएको छ । अन्य २५ जना घाइतेको अर्घाखाँची अस्पतालमा उपचार भइरहेको छ ।

प्रहरी र स्थानीयवासीले घटनास्थलमा उद्धार गरेका थिए । घटनाको अनुसन्धान भइरहेको प्रहरीको भनाइ छ । यही घटनामा अरु ३ वटा गाडीमा पनि क्षती भएको छ ।

असोज १४,पोखरा- पर्सि बुधवारदेखि कोशीदेखि गण्डकी प्रदेशसम्म पानी पर्ने मौसमविद्ले अनुमान गरेका छन् । पर्सिदेखि शनिवारसम्म नै कोशी, मधेश, बाग्मती र गण्डकी प्रदेशमा हल्कादेखि मध्यम वर्षाको सम्भावना रहेको त्रिभुवन विश्वविद्यालयको मौसम विज्ञान केन्द्रीय विभागका सहप्राध्यापक विनोद पोखरेलले बताउनुभएको छ ।

विशेष गरेर बेलुकीपख पानी पर्ने उहाँले उल्लेख गर्नुभएको छ । आज देशका धेरैजसो ठाउँमा घाम लागेको छ । बेलुकादेखि बदली हुनेछ । भोलि कोशी प्रदेशमा बेलुकातिर हल्का वर्षाको सम्भावना छ । भोलि बाग्मती र गण्डकीमा पनि बदली भए पनि वर्षाको सम्भावना कम छ । तर पर्सिदेखि भने कोशीबाट गण्डकी प्रदेशसम्म पानी पर्नेछ । तर लुम्बिनी, कर्णाली र सुदूरपश्चिम प्रदेशमा भने अहिले वर्षाको सम्भावना देखिएको छैन ।

गएको बिहीवारदेखि भएको अति ठूलो वर्षाका कारण कोशीदेखि लुम्बिनी प्रदेशसम्म ठूलो जनधनको क्षति भएको छ । अहिलेसम्म एक सय ९० जनाभन्दा धेरैको ज्यान गएको पुष्टि भइसकेको छ ।

असोज १३,पोखरा- धादिङको झ्याप्ले खोलामा पहिरोमा पुरिएको अवस्थामा थप १३ जनाको शव फेला परेको छ।

पहिरोले पुरिएका बसबाट शवहरु निकालिएको हो। झ्याप्ले खोलामा अरु बस पनि पुरिएको आशंकामा खोजी कार्य भइरहेको प्रहरीले जनाएको छ।

सोहि स्थानमा गोरखाको लापुबेसिबाट काठमाडौंका लागि छुटेको यात्रुबाहक बस पहिरोले पुरिएको अवस्थामा फेला परेको छ। यात्रुबाहक बस पृथ्वीराजमार्गको झ्याप्लेखोला पहिरोभित्र भेटिएको यातायात व्यवसायीहरुले बताएका छन्।

शुक्रबार बिहान ७ बजे गोरखाको लापुबेसिबाट काठमाडौंका लागि छुटेको ना ४ ख २२७० नम्बरको बस तीन दिनदेखि सम्पर्कविहिन भएको थियो।

झ्याप्ले खोलामै आएको पहिरोले माइक्रोबस पुरिँदा शनिबार १४ जनाको मृत्यु भएको थियो। बुटवलबाट काठमाडौं आईरहेको माइक्रोबस पहिरोमा पुरिएको हो। १४ जना यात्रुको शव शनिबार साँझ निकालिएको थियो।