प्रदेश खबर

बैसाख १३,पोखरा – मानवसेवा फाउण्डेशनको आयोजनामा आज बिहान पोखरामा बृहत् मोटरसाइकल र्‍याली सम्पन्न भएको छ। बैशाख १७ देखि जेठ २६ गतेसम्म सञ्चालन हुने श्री गण्डकी शतकुण्डीय गायत्री कोटीहोम विराट ज्ञान महायज्ञको प्रचार–प्रसार तथा धार्मिक–सामाजिक सद्भावको सन्देश प्रवाह गर्ने उद्देश्यले मोटरसाइकल र्यालीको आयोजना गरिएको हो ।

र्‍याली बिरौटास्थित कोटिहोम स्थलबाट बिहान ७ बजे सुरु भएको थियो। र्‍यालीले ड्यामसाइड, लेकसाइड, हल्लनचोक, जिरोकिलोमिटर, मालेपाटन, बाग्लुङ बसपार्क, हरिचोक, बगर, पृथ्वीनारायण क्याम्पस गेट, नदीपुर, महेन्द्रपुल, रानीपौवा, सितला देवी, कुँडुहर, मियापाटन, अमरशिंहचोक, रामबजार, बुद्धचोक, पृथ्वीचोक, नागढुङ्गा, मुस्ताङचोक हुँदै पुनः बिरौटा कोटिहोम स्थलमा पुगेर समापन भएको थियो।

महायज्ञका संकल्पकर्ता विजय कृष्ण मूर्ति महाराजले मोटरसाइकल र्‍यालीले पोखरावासीमा धार्मिक जागरण र सामाजिक एकताको सन्देश प्रवाह गरेको बताए । “यो र्‍यालीले महायज्ञप्रतिको उत्साहलाई अझै बढाएको छ। पोखरेली जनताको सहभागिताले हामीलाई थप प्रेरणा मिलेको छ,” उनले भने । र्‍यालीमा सहभागी मोटरसाइकल चालकहरूले महायज्ञको सन्देश बोकेका ब्यानर, प्लेकार्ड र झण्डाहरू प्रदर्शन गरे। धार्मिक भजन र सन्देशमूलक नाराहरूले र्‍यालीको वातावरणलाई उत्साहपूर्ण बनाएको थियो।

आजको अतिथिको विशेष आकर्षणमा पश्चिमाञ्चल अटोमोबाइल डिलर्स एसोसिएसनका पूर्व अध्यक्ष तथा होन्डा मोटरसाइकल बिक्रेता चन्द्र कुँवरको सहभागिता रहेको थियो। उनले मोटरसाइकल र्‍यालीको आयोजनाले सामाजिक एकता र धार्मिक उत्साहलाई प्रोत्साहन गरेको भन्दै आयोजकलाई धन्यवाद दिए । मानवसेवा फाउण्डेशनले महायज्ञको प्रचारका लागि थप कार्यक्रमहरूको आयोजना गरिरहेको छ। फाउण्डेशनका अनुसार,बैशाख १४ गते फेवातालमा डुङ्गा र्‍याली र बैशाख १६ गते बृहत् कलशयात्रा हुनेछ। यसअघि बैशाख ११ गते साइकल र्‍याली र बैशाख १२ गते ट्याक्सी र्‍याली सम्पन्न भइसकेका छन्। फाउण्डेशनले आगामी कार्यक्रमहरूमा सहभागी भई महायज्ञलाई भव्य र सभ्य बनाउन सबैमा अपिल गरेको छ।

बैशाख १२,पोखरा – स्याङ्जाको गल्याङ नगरपालिका – १ राम्दीस्थित सिद्धार्थ राजमार्गमा अवैध रुपमा भन्सार छलेर ल्याइएको सामान प्रहरीले बरामद भएको छ ।

प्रहरीले बिल नभएको ५० केजी तौलको चिनीका २१० बोरा, ५ केजीको भुजाका ३९ बोरा र ३० केजीको केराउका १८ बोरा बरामद गरेको छ ।

सिद्धार्थ राजमार्गमा चेकजाँच गर्ने क्रममा बुटवलबाट पोखरातर्फ आउँदै गरेको लु २ ख १९२१ नम्बरको मिनि ट्रकबाट अवैध सामान भेटिएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक हरिप्रसाद पौडेलले जानकारी दिए ।

शुक्रबार बिहान साढे एक बजे चेकजाँचका क्रममा अवैध सामान भेटिएपछि ट्रक, चालक र सहचालकहरुलाई पक्राउ गरिएको डिएसपी पौडेलले बताए ।

पक्राउ पर्नेमा चालक रुपन्देही सुद्योधन गाउँपालिका वडा नम्बर – ३ का २४ वर्षीय वसन्त परियार र सहचालक पाल्पा रैनादेवी छहरा गाउँपालिका वडा नम्बर – ४ का ४० वर्षीय सुमन वि.क. र रुपन्देही सियारी गाउँपालिका वडा नम्बर – ६ का २३ वर्षीय दिप्सन सुनार रहेका छन् ।

प्रहरीका अनुसार बरामद गरिएका सामान र पक्राउ परेका तीनैजनालाई आवश्यक कारबाहीका लागि राजस्व अनुसन्धान कार्यालय बुटवल पठाइएको छ ।

बैशाख ६,पोखरा – नेष्डो समृद्ध लघुवित्त वित्तीय संस्था लिमिटेडको सेवालाई थप विस्तार गर्नको लागि हालै भर्ना गरिएका ८२ जना कर्मचारीको लागि आयोजित ३ दिने सेवा प्रवेश पुर्व सैद्धान्तिक तालिम शनिवार पोखरामा शुभारम्भ भएको छ । तालिममा देशभरवाट १२ जना अधिकृत तथा ७० जना सहायक कर्मचारीको सहभागिता रहेको छ । सहभागी कर्मचारी मध्ये ६१ जना महिला र २१ जना पुरुष रहनु भएको छ ।

तालिम शुभारम्भ समारोहमा प्रमुख अतिथिको आसनवाट वोल्दै संस्थाका संस्थापक अध्यक्ष डा. विश्व प्रकाश प्रसाईले देशमा अझै अभाव र विपन्नता विद्यमान रहेकोले लघुवित्तको आवश्यकता रहि रहेको वताउनु भयो । विगतको द्वन्दको समयमा ग्रामीण क्षेत्रमा पुगी जनतालाई घरदैलोमा वित्तीय सेवा दिंदै आएका लघुवित्त संस्थाको भुमिका अहिले पनि उत्तिकै रहेको भन्दै प्रभावकारी सेवा विस्तारको लागि नयाँ कर्मचारी भर्ना गरिएको वताउनु भयो । भौतिक विकास निर्माणको उपयोग गर्न विपन्न परिवारको आर्थिक अवस्थामा सुधार हुनुपर्ने भन्दै गरिवी न्यूनिकरणको लागि लघुवित्तको विकल्प नहरेको वताउनु भयो । प्रसाईले लघुवित्तले देशमा गरिवी न्यूनिकरणको साथसाथै शिक्षित युवाहरुलाई रोजगारी र लाखौं विपन्न तथा मध्यम आर्थिक स्तरका परिवारलाई स्वःरोजगारीको सृजना गरेको वताउनु भयो । प्रमुख अतिथि प्रसाईले देशमा गरिवी रहेसम्म गरिवी विरुद्धको आफ्नो अभियान निरन्तर जारी रहने भन्दै लघुवित्त सेवाले वैदेशिक पलायन रोकेको उहाँले दावी गर्नु भयो ।

तालिम कार्यक्रम संस्थाका कायममुकाय कार्यकारी प्रमुख युधिष्ठिर भुषाल शर्माको अध्यक्षता, संस्थापक अध्यक्ष विश्व प्रकाश प्रसाईको प्रमुख आतिथ्यता, मानव शंसाधन प्रमुख उत्तम प्रसाद अधिकारीको स्वागत, लक्ष्मी गाहाको प्रतिज्ञा एवम् मानव शंसाधन अधिकृत इश्वरी प्रसाद शर्माको सञ्चालनमा सम्पन्न भएको संस्थाका प्रवन्धक नारायण प्रसाईले जानकारी दिनु भएको छ ।

बैशाख ५,पोखरा – स्याङ्जामा ११ वर्षीया नाबालिकलाई जबरजस्ती करणी गरेको आरोपमा एक जना पक्राउ परेका छन् । पक्राउ पर्नेमा स्याङ्जा चापाकोट नगरपालिका – ८ का ५४ वर्षीय अर्जुन भन्ने ख्याम कर्ण दमै रहेका छन् ।

प्रहरीका अनुसार ती नाबालिकलाई गत साउन १५ गते जबरजस्ती करणी गरेको भन्ने उजुरीमा उल्लेख छ । ती नाबालिकका अभिभावकले दिएको जाहेरीका आधारमा उनलाई पक्राउ गरिएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक हरिप्रसाद पौडेलले जानकारी दिए ।

पक्राउ परेका अर्जुनलाई जबरजस्ती करणी शीर्षकमा मुद्धा दर्ता स्याङजा जिल्ला अदालतबाट म्याद थप अनुमति लिई आवश्यक अनुसन्धान अगाडि बढाइएको प्रहरीले जनाएको छ ।

बैशाख ४,पोखरा – पोखरा महानगरपालिकाले हलोगोरु पाल्ने महानगरका किसानलाई प्रतिपरिवार रु १० हजार अनुदान प्रदान गरेको छ ।

महानगरपालिका क्षेत्रमा हलगोरु पालिरहेका किसानलाई प्रोत्साहन गर्न अनुदान दिइएको महानगर प्रमुख धनराज आचार्यले जानकारी दिए । पोखराको भूबनोटका कारण सबै ठाउँमा ट्याक्टर प्रयोग गर्न नसकिने भएकाले हलगोरु पाल्ने किसानलाई अनुदान दिइएको उनले बताए।

गत भदौमा अनुदानसम्बन्धी सार्वजनिक सूचना जारी गरिएकामा ५७० जनाले आवेदन गरेका थिए । महानगरको कृषि विकास शाखाले स्थलगत अनुगमन गरेपछि ५५० किसानलाई रकम प्रदान गर्न थालेको हो ।

बैसाख ४,पोखरा – काठमाण्डौ उपत्यकासहित देशैभर स्थानीय र पश्चिमी वायुको प्रभाव परेको छ । साथै भारतको उत्तर प्रदेश आसपास बनेको न्यून चापीय प्रणालीको पनि प्रभाव छ ।

त्यसको प्रभावले बिहानैदेखि कोशी, बागमती, गण्डकी, कर्णाली र सुदूरपश्चिम प्रदेशको केही ठाउँमा मेघगर्जन/चट्याङसहित हल्कादेखि मध्यम वर्षा भइरहेको जल तथा मौसम पूर्वानुमान महाशाखाले जनाएको छ ।

महाशाखाका अनुसार अहिले कास्की, पर्वत, स्याङ्जा, लमजुङ, दैलेख, सुर्खेत, इलाम, धनकुटा, डोटी, बैतडी, बझाङ, गोरखा,दाङ, रोल्पा, पूर्वी रुकुम, पश्चिम रुकुम, सल्यान, जाजरकोटलगायतका क्षेत्रमा हल्का वर्षा भइरहेको छ ।

आज दिउँसो कोशी प्रदेशका केही ठाउँमा अरू ठाउँमा भन्दा ठूलो पानी पर्ने सम्भावना रहेको मौसम पूर्वानुमान महाशाखाले जनाएको छ । यस्तै हिमाली भेगका केही ठाउँमा हिमपातको समेत सम्भावना रहेको छ ।

देशका धेरै ठाउँमा मेघगर्जन र चट्याङसँगै वर्षा, हिमपातका कारण कृषि, दैनिक जनजीवन, स्वास्थ्य, सडक तथा हवाई यातायातमा समेत प्रभाव पर्न सक्ने हुँदा त्यसबाट हुनसक्ने असरबाट बच्न आवश्यक उपाय तथा सतर्कता अपनाउन महाशाखाले अनुरोध छ ।

यो हप्ता गहुँ, मुसुरोलगायत अन्न तथा दलहन बाली नकाट्न मौसमविद्ले आग्रह गरेका छन् । पानी पार्ने नयाँ प्रणालीको प्रभाव आउँदो सोमवारसम्म रहने मौसमविद्को अनुमान छ ।

बैशाख ३,पोखरा – अनलाइन भुक्तानी प्लेटफर्म ई–सेवाबाट एक करोडभन्दा बढी रकम चोरी गर्ने युवक पक्राउ परेका छन् ।

पक्राउ पर्नेमा कन्चनपुरको कृष्णपुर नगरपालिका–१ घर भइ काठमाडौँ अनामनगर बस्ने २२ वर्षीय राहुल बुढा छन् ।

उनलाई काठमाडौँ उपत्यका अपराध अनुसन्धान कार्यालयको टोलीले कालिमाटीबाट हिजो मंगलबार पक्राउ गरेको हो ।

उनले विभिन्न फिसिङ लिंकहरू पठाएर ४ हजार व्यक्तिको ई–सेवा अकाउन्टबाट १ करोड २ लाख रुपैयाँ चोरी गरेको पाइएको प्रहरीले जनाएको छ ।

प्रहरीका अनुसार उनले ईसेवा प्रयोगकर्ताहरूलाई एसएमएसमार्फत द अलर्ट, एटी अलर्टजस्ता फिसिङ लिङ्कहरू पठाउँथे । त्यसपछि भेरिफाइका लागि भन्दै लिंक खोल्न लगाएर ईसेवा अनधिकृत पहुँच पुर्‍याउँथे ।

उक्त रकम उनले पशुपति ग्लोबल इनोभेसन प्रालिको मर्चेन्ट खाताहरुमा जम्मा गरेको पाइएको छ ।

अहिले उनलाई थप अनुसन्धान र कारबाहीका लागि जिल्ला प्रहरी परिसर भद्रकाली पठाइएको प्रहरीले जनाएको छ ।

बैशाख ३,पोखरा – पोखरा महानगरपालिका वडा नं. १७ मा वैशाख १७ गतेदेखि जेठको २६ गते सम्म हुने श्री गण्डकी शत कुण्डीय गायत्री कोटिहोम विराट ज्ञान महायज्ञको भूमी पुजन आज सम्पन्न भएको छ । आज बिहान ११ बजेर एक मिनेटमा दिप प्रज्वलनसहित भुमि पुजन गरिएको हो । महायज्ञका लागि आजदेखि नै मुल हवन कुण्ड खन्ने काम सुरु भएको छ ।बिहान ११ बजेर ११ मिनेटमा मुल हवन कुण्ड खन्न सुरु गरिएको आयोजक मानवसेवा फाउण्डेसनका संस्थापक विजय कृष्णमुर्ति बताए । महायज्ञमा आज कथाबाचिका बाल विदुषी अनुराधा पाण्डेयले कथावाचन गरेकी छन् । संस्थापक विजय कृष्णमुर्तिका अनुसार महायज्ञमा बिहिबारबाट देवी प्रतिभाबाट कथावाचन हुने छ ।

गत चैत्र १७ गते देखि नै कोटिहोम महायज्ञको पूर्वसन्ध्यामा श्रीमद्भागवत कथा प्रवचन लगायत अन्य कोटिहोम महायज्ञको प्रचारप्रसारका कार्यक्रमहरु भइरहेको छ ।

भुमिपुजन कार्यक्रममा पोखरा महानगरपालिका वडा नं. १७ का वडाअध्यक्ष राधिका शाही योगीले लामो समयसम्म महायज्ञ कहाँ गर्ने भन्ने अन्योलका बीच आफ्नो संयोजकत्वमा वडा नं. १७ स्थित हरिहर मन्दिरको जग्गामा महायज्ञ गर्ने निर्णयमा पुगेको स्मरण गरिन् । पोखरा १७ मा शतसयकुण्डीय कोटिहोम हुनु गौरवको विषय भएको उनको भनाई छ ।

कार्यक्रममा विश्व हिन्दु महासंघका बरिष्ठ उपाध्यक्ष शंकर खरालले नेपालका अध्यात्मिक व्यक्ति योगी नरहरिनाथको संकल्पमा निर्मित हरिहर मन्दिरमा कोटिहोम गर्न पाउनु गौरवको विषय भएको बताए । यति विशाल कोटिहोम न विगतमा भएको थियो र न अब हुनेछ भन्दै कोटिहोममा सहभागी हुन पोखरेलीहरुलाई आग्रह गरे ।

कोटिहोमकै अवसरमा राष्ट्रिय भजन प्रतियोगिता समेत हुदैछ । वैशाख १७ गतेदेखि जेठको २६ गते सम्म पोखरामा हुने ऐतिहासिक श्री गण्डकी शत कुण्डीय गायत्री कोटिहोम विराट्‌ज्ञान महायज्ञ २०८२ अन्तरगत यो प्रतियोगिता हुन लागेको प्रतियोगिता संयोजक राष्ट्रिय लोक भजन चुड्का संरक्षण प्रतिष्ठान नेपालका संस्थापक अध्यक्ष प्रजापति पराजुलीले जानकारी दिए ।