राजनीति

असोज ३ , पोखरा – नेपाली कांग्रेसको वडा तहको अधिवेशनमा आजदेखि सुरु भएको छ । कांग्रेसको १५ औँ महाधिवेशन प्रक्रिया अन्तर्गत वडा अधिवेशन सुरु भएको हो । पार्टी सभापति गगन थापाले आफ्नो क्रियाशील सदस्यता रहेको वडा नम्बर ३० मा अधिवेशनको उद्घाटन गर्दै सम्बोधन गर्नुभएको छ । साथै उहाले आफ्नो मनोनयन दर्ता पनि गराउनुभएको छ । आज र भोलि देशभर हुने वडा तहको अधिवेशनमा सम्पूर्ण क्रियाशील सदस्य तथा पार्टीका सबै तह र निकायलाई उत्साहप्रद रूपमा सहभागी हुन पार्टीले आग्रह गरेको छ।

कांग्रेस केन्द्रीय कार्यसमितिको निर्णयअनुसार आगामी असोज १६ देखि १९ गतेसम्म १५औँ केन्द्रीय महाधिवेशन हुँदैछ । त्यसअन्तर्गत वडा तहको निर्वाचन कार्यक्रमका लागि ७७ वटै जिल्लामा निर्वाचन अधिकृत खटाइसकिएको केन्द्रीय निर्वाचन समितिले जनाएको छ ।

भदौ १० , पोखरा – प्रधानमन्त्री वालेन्द्र शाहले आज प्रतिनिधिसभाको बैठकमा उपस्थित भएर सांसदहरूले उठाएका प्रश्नहरूको प्रत्यक्ष उत्तर दिँदै हुनुहुन्छ । प्रतिनिधिसभा नियमावलीको व्यवस्थाअनुसार प्रधानमन्त्रीले पहिलो पटक नियमपूर्वक प्रत्यक्ष प्रश्नोत्तर कार्यक्रममा भाग लिन लाग्नुभएको हो । प्रतिनिधिसभा नियमावलीको परिच्छेद ९ मा हरेक महिनाको पहिलो हप्ता प्रधानमन्त्रीले संसदमा उपस्थित भई सांसदहरूका लिखित प्रश्नको जवाफ दिनुपर्ने प्रावधान छ । यसअघि जेठ १७ गते प्रधानमन्त्री शाह सांसदको प्रश्नको जवाफ दिन भन्दै अचानक संसद् पुग्नुभएकोमा त्यसयता जवाफ दिन नआएपछि सभामुख डीपी अर्यालले भदौ १ गतेको बैठकबाट आजको बैठकमा अनिवार्य उपस्थित हुन रुलिङ गर्नुभएको थियो ।

आजको बैठकमा प्रमुख प्रतिपक्षी दल नेपाली कांग्रेस, नेकपा एमाले, नेकपा, रास्वपा, राप्रपा र श्रम संस्कृति पार्टीका गरी ११ जना सांसदले प्रश्न सोध्दै छन् । सांसदहरूले मुख्य गरी यसअघि जेठ १७ गते संसद्मा प्रधानमन्त्रीले नेपाल–भारत सीमा सम्बन्धमा दिएको अभिव्यक्ति विवादमा परेकाले यस विषय स्पष्ट पार्न, सरकारको तीन महिने कार्यकालको समीक्षा, सुशासन, बजेट कार्यान्वयन र समसामयिक विकास निर्माणबारे र संसद्प्रति सरकारको जवाफदेहिताका विषयमा केन्द्रित रहेर प्रश्न दर्ता गराएका छन् ।

यसैबीच, प्रधानमन्त्री शाहले चिकित्सकको परामर्शअनुसार संसदमा कालो चस्मा लगाएर आउने पूर्वजानकारी संसद् सचिवालयलाई गराउनुभएको छ । वीरेन्द्र सैनिक अस्पतालका नेत्ररोग विशेषज्ञले उज्यालोमा देख्न कठिनाइ हुने समस्याका कारण उहाँलाई सनग्लास र आई ड्रप प्रयोग गर्न सिफारिस गर्नुभएको थियो । संसदमा मर्यादा र पोसाकसम्बन्धी बहस चलिरहेका बेला प्रधानमन्त्रीले चिकित्सकको सिफारिससहितको पत्र सचिवालयमा पठाउनुभएको हो ।

भदौ ३ , पोखरा – नेपाली कांग्रेस कोशी प्रदेश संसदीय दलले सरकारलाई दिएको समर्थन फिर्ता लिने निर्णय गरेको छ ।

कांग्रेससँगको सहकार्य टुटेपछि प्रदेशमा नेकपा एमाले र नेकपाको सरकार छ । बुधबार बसेको कांग्रेस संसदीय दलको बैठकले सरकारलाई दिएको समर्थन फिर्ता लिने निर्णय गरेको हो ।कांग्रेस प्रमुख सचेतक गोपाल तामाङका अनुसार बुधबार बसेको संसदीय दलको बैठकले सरकारलाई दिएको समर्थन फिर्ता लिने निर्णय गरेको हो ।

नेपाली कांग्रेसले अब संसद्मा रचनात्मक प्रतिपक्षको भूमिका निर्वाह गर्ने पनि उहाले बताउनुभयो ।

भदौ २ , पोखरा – प्रतिनिधिसभामा यही भदौ १० गते बुधवार प्रधानमन्त्री वालेन्द्र शाह (बालेन)सँग सांसदहरुको प्रत्यक्ष प्रश्नोत्तर कार्यक्रम तय गरिएको छ ।

सभामुख डोलप्रसाद अर्यालले प्रतिनिधिसभाको हिजो सोमवारको बैठकमा प्रधानमन्त्री शाहसँग प्रतिनिधिसभामा प्रश्नोत्तरको कार्यक्रम तय गरिएको जानकारी दिनुभएको हो । सभामुख अर्यालले प्रधानमन्त्री शाहलाई प्रतिनिधिसभा बैठकमा उपस्थित भएर सांसदका प्रश्नको जवाफ दिन ‘रुलिङ’ गर्नुभएको थियो ।

गएको जेठ १७ मा प्रतिनिधिसभामा प्रधानमन्त्री शाहले सीमासम्बन्धी विवादास्पद अभिव्यक्ति दिएपछि नै सांसदहरूले संसद् आएर स्पष्टीकरण दिनुपर्ने माग गर्दै आएका थिए ।

सभामुख अर्यालले विपक्षी दलहरूले माग गरेबमोजिम नै प्रधानमन्त्रीका नाममा आफूले ‘रुलिङ’ गरेको उल्लेख गर्नुभयो । प्रश्नकर्ता सदस्यले यही शुक्रवार १ बजेभित्र प्रतिनिधिसभाका सचिवसमक्ष आफ्नो प्रश्न लिखित रूपमा दिन सक्नेछन् ।

साउन २८ , पोखरा – नेपाली कांग्रेसका निवर्तमान सभापति शेरबहादुर देउवाले आफू पाँच महिना लामो उपचारपछि स्वदेश फर्किन पाउँदा खुसी भएको बताउनुभएको छ । सिंगापुरमा उपचार लागि गएको पाँच महिनापछि आज बिहीबार साढे १२ बजे त्रिभुवन अन्तर्राष्ट्रिय विमानस्थल ओर्लिएका उहाले अपिलपत्र जारी गर्दै आफ्नो स्वास्थ्यप्रति चासो र चिन्ता राख्ने सबैलाई धन्यवाद भन्नुभाएको छ । उहाले आफू सेवकका रुपमा उपस्थित भएको पनि बताउनुभएको छ ।

‘आज यहाँ विनम्र सेवकका रूपमा उपस्थित भएको छु- सुन्न, सिक्न र समुन्नत मुलुक बनाउने यात्रामा समर्पित हुन,’ उहाले भन्नुभयो , ‘कृतज्ञताले परिपूर्ण हृदय र परिवर्तनका समीरलाई आत्मसात् गर्न तत्पर खुला चेतनासहित स्वास्थ्य उपचार सकेर म तपाईंहरूमाझ पाँच महिनापछि फर्किएको छु।’

साउन २५ , पाेखरा – प्रधानमन्त्री वालेन्द्र शाहसँग नेपालका लागि भारतका राजदूत नवीन श्रीवास्तवले शिष्टाचार भेट गर्नुभएको छ ।

प्रधानमन्त्री तथा मन्त्रिपरिषद्को कार्यालयमा आज भएको भेटमा उहाँहरूबीच नेपाल–भारत सम्बन्ध, द्विपक्षीय मित्रता, पारस्परिक हित, विकास साझेदारी तथा सहकार्यका विविध विषयमा छलफल भएको प्रधानमन्त्रीकाे सचिवालयले जनाएकाे छ ।

प्रधानमन्त्री शाहले भारतसँगको ऐतिहासिक सम्बन्धलाई अझ प्रगाढ बनाउँदै साझा हितका क्षेत्रमा मिलेर काम गर्नुपर्ने विषयमा जोड दिनुभएको थियो ।

राजदूत श्रीवास्तवले प्रधानमन्त्री शाहलाई कार्यकालको सफलताको शुभकामना व्यक्त गर्दै दुई देशबीचको सम्बन्ध र सहकार्यलाई अझ सुदृढ बनाउने प्रतिबद्धता जनाउनुभयो ।

प्रधानमन्त्री शाहसँग आजै नेपालका लागि चीनका राजदूत चाङ माओमिङले पनि भेट गर्ने कार्यक्रम छ ।

साउन १६ पाेखरा – नेपाली कांग्रेस गण्डकी प्रदेश संसदीय दलले प्रदेशमा सरकार सञ्चालनका लागि मुख्यमन्त्री सुरेन्द्रराज पाण्डेलाई पूर्ण अख्तियारी दिएको छ । पोखरामा शुक्रबार बसेको दलको बैठकले प्रदेश सभामा प्रतिनिधित्व गर्ने दलहरूबीच समन्वय, सहकार्य र सहमति कायम गर्ने सम्पूर्ण अधिकार पाण्डेलाई सुम्पने निर्णय गरेको हो । प्रदेश सरकार सञ्चालनमा पछिल्लो समय देखिएको परिस्थितिको मूल्यांकन गर्दै कांग्रेसले नेतृत्व जोगाउन र राजनीतिक समझदारी बनाउन यस्तो कदम चालेको हो ।

मुख्यमन्त्री पाण्डेको अध्यक्षतामा बसेको बैठकले सरकार सञ्चालनका लागि आवश्यक सबै पहल गर्ने जिम्मा उहाँलाई दिएको छ । प्रमुख सचेतक प्रकाश बरालले दलहरूबीच सहकार्य र सहमतिको वातावरण बनाउने अधिकार पाण्डेलाई दिइएको बताउनुभयाे । बैठकले प्रदेश प्रमुखले फिर्ता पठाएको गाँजा खेती नियमन र उपयोग सम्बन्धी विधेयक पुनः पारित गर्ने निर्णय समेत गरेको छ । औषधिजन्य र औद्योगिक प्रयोजनका लागि ल्याइएको यो विधेयक संघीय कानुनसँग बाझिएको भन्दै प्रदेश प्रमुखले फिर्ता गर्नुभएकाे थियाे ।

‘संघीय कानुनसँग बाझिएको भनिएको विषयको अन्तिम निरूपण संवैधानिक इजलासले गर्नेछ,’ निर्णयमा भनिएको छ, ‘हाललाई यो विधेयक पुनः पारित गरी प्रमाणीकरणका लागि प्रदेश प्रमुखसमक्ष पठाइनेछ ।’ कांग्रेसले यो विधेयक अगाडि बढाउन आवश्यक भूमिका निर्वाह गर्ने तय गरेको छ । बैठकले सुनसरी र मधेश प्रदेशका जिल्लाहरूमा भएका घटनाप्रति गहिरो दुःख व्यक्त गरेको छ । दिवंगतहरूप्रति श्रद्धाञ्जली अर्पण गर्दै बैठकले घाइतेहरूको निःशुल्क उपचार गर्न नेपाल सरकारसँग माग गरेको छ ।

साउन १५ , पोखरा – सुनसरीको देवानगञ्जमा गएको आइतबार राति भएको घटनामा ज्यान गुमाएका दुई युवकका परिवार र सरकारबीच ७ बुँदे सहमति भएको छ । घटनास्थल पुगेका गृहमन्त्री सुधन गुरुङको उपस्थितिमा मृतकका परिवारसँग सहमति भएको हो ।

सहमतिअनुसार नेपाल सरकारले मृतकद्वय ओमप्रकाश मेहता र जयप्रकाश मेहतालाई शहीद घोषणा गर्ने प्रक्रिया तत्काल अघि बढाउनेछ । साथै, दुवै परिवारलाई १०/१० लाख रुपैयाँका दरले राहत उपलब्ध गराइने भएको छ ।

घटनाको निष्पक्ष र प्रभावकारी छानबिन गरी दोषीमाथि तत्काल कानुनी कारबाही अघि बढाउने, मृतकका परिवारका एक–एक जना योग्य सदस्यलाई रोजगारीको अवसर उपलब्ध गराउने, घटनाको अध्ययनका लागि गठित छानबिन समितिले दिने प्रतिवेदनका सुझाव र सिफारिसहरू यथाशीघ्र कार्यान्वयन गर्ने, मृतकहरूको सम्झनामा स्थानीय सरकारसँगको समन्वयमा उपयुक्त ठाउँमा स्मृति पार्क बनाउने सहमति पनि भएको छ ।

घटनामा ज्यान गुमाएकाका परिवार तथा गृह मन्त्रालयबीच गएराति सहमति भएको हो ।

साउन १५ , पोखरा – प्रधानमन्त्री बालेन्द्र शाहले सुनसरीलगायतका जिल्लामा भएको घटनाको निष्पक्ष छानबिन गर्ने प्रतिबद्धता व्यक्त गर्नुभएको छ ।

सुनसरीको देवानगञ्ज, सिरहा, धनुषालगायतका जिल्लामा विकसित घटनालाई लिएर हिजो बेलुका राष्ट्रका नाममा सम्बोधन गर्दै प्रधानमन्त्री शाहले निष्पक्ष छानबिन हुने बताउनुभएको हो ।

सुनसरीमा गएको आइतवार भएको घटना र त्यसपछि उत्पन्न वातावरणप्रति सरकार पूर्णरूपमा गम्भीर र संवेदनशील रहेको उहाँले उल्लेख गर्नुभयो ।

प्रधानमन्त्री शाहले सुनसरीलगायतका जिल्लामा देखिएको तनाव अन्त्य गर्न सबै पक्षले आ-आफ्नो ठाउँबाट पहल गर्न अपील गर्नुभएको छ ।

‘हाम्रो इतिहास साक्षी छ- कठिनभन्दा कठिन र अप्ठ्यारो परिस्थितिमा पनि आपसी एकता, सहिष्णुता र विवेक नै हाम्रा सबैभन्दा ठूला शक्ति बनेका छन् । हामी सबैले जिम्मेवार नागरिकको भूमिका निर्वाह गर्दै यो सुन्दर र शान्त नेपाली आकाशमा मडारिएको अशान्तिको बादल हटाउनुपर्ने छ’, शाहले भन्नुभयो ।

प्रधानमन्त्री शाहले संवेदनशील घडीमा सामाजिक सञ्जाल वा अन्य माध्यमबाट असत्य, अपुष्ट सूचना, अफवाह, घृणा फैलाउने सामग्री वा समुदायबीच वैमनस्य बढाउने अभिव्यक्तिको प्रचारप्रसार नगर्न अनुरोध गर्नुभयो । साथै सरकारी निकायहरूबाट जारी भएका आधिकारिक तथ्य र सूचनामा मात्र विश्वास गर्न उहाँको आग्रह छ ।

उहाँले घटनामा ज्यान गुमाएका जयप्रकाश मेहता, ओमप्रकाश मेहता र गणेश यादवप्रति श्रद्धाञ्जली अर्पण गर्दै शोकसन्तप्त परिवारजनमा समवेदना पनि प्रकट गर्नुभयो ।