राजनीति

मंसिर १६,पर्बत – नेपाली कांग्रेस, पर्वत क क्षेत्रीय कार्य समितिको आयोजनामा कुश्मा नगरपालिका, वडा नं. २ खुर्कोटमा आईतावार जेष्ठ नागरीक सम्मान कार्यक्रम सम्पन्न भएको छ । वडाभरका एक सय भन्दा वढि जेष्ठ नागरीकलाई सम्मान गरिएको कार्यक्रममा प्रमुख अतिथिको आसनवाट वोल्दै नेपाली कांग्रेसका केन्द्रिय सदस्य अर्जुन प्रसाद जोशीले विकास निर्माण देखि हरेक नागरीकको सम्मान गर्ने पाटी नेपाली कांग्रेस भएको वताउनु भयो । उहाँले आँफू ३ पटकसम्म जन निवार्चित शांसदको हैसियतले जिल्लाको हरेक विकास निर्माणमा योगदान गरेको वताउदै अहिले काम भन्दा कुराले जनतालाई भ्रमित वनाएको वताउनु भयो । केही समय अगाडीसम्म नयाँ पाटीहरु उदाए पनि अहिले उनिहरुको वास्तविकता उदाङ्गिएको उहाँको भनाई थियो । कार्यक्रममा विशिष्ट अतितिको आसनवाट वोल्दै केन्द्रिय सदस्य एवम् सय दिने अभियानका केन्द्रिय प्रतिनिधी गोविन्द वहादुर शाहले देशमा प्रजातन्त्र ल्याउने, विकास निर्माणको जग वसाउने, धर्मको रक्षा गर्ने एवम् महिला दलित गरिवको वारेमा सोच्ने पाटी नेपाली कांग्रेस भएको वताउनु भयो ।

कांग्रेसका पनि कमीकमजोरी हुन सक्छन तर नेपालमा सवै भन्दा लामो समय सरकारमा रहेको कारण पनि देशको विकास निर्माणको जस पनि कांग्रेसले पाउनुपर्ने उहाँको भनाई थियो ।

क्षेत्रीय सभापति राजकुमार क्षेत्रीको सभापतित्व, कोषाध्यक्ष चित्रकला भारतीको स्वागत, सुरेन्द्र के.सी. को धन्यवाद एवम् सचिव केशव प्रसाद उपाध्यायको सञ्चालनमा सम्पन्न कार्यक्रममा गण्डकी प्रदेश सभा सदस्य रेखा गुरुङ्ग, पुर्व जिल्ला सभापति खिमप्रसाद भुषाल, जिल्ला सदस्य गणेश वहादुर क्षेत्री, सरस्वती शर्मा जिज्ञासु, वडा वडा अध्यक्ष लालकृष्ण शर्मा, कांग्रेस वडा सभापति तिर्थ सुवेदी लगायतले शुभकामना व्यक्त गर्नु भएको थियो ।

मंसिर ९,पोखरा – राष्ट्रपति रामचन्द्र पौडेलले उपनिर्वाचनमा सेना परिचालन गर्न स्वीकृति दिएका छन् । राष्ट्रपति कार्यालयकी प्रवक्ता शैलजा रेग्मी भट्टराईका अनुसार संविधानको धारा ६६ को उपधारा (२) बमोजिम सेना परिचालनका लागि स्वीकृति प्रदान गरिएको हो ।

प्रधानमन्त्री केपी शर्मा ओलीले गत बिहीबार मन्त्रिपरिषद्को निर्णय अनुसार सेना परिचालनका लागि स्वीकृति दिन सिफारिस गरेका थिए ।

उपनिर्वाचनलाई सुरक्षित, भयरहित, निष्पक्ष एवम् शान्तिपूर्ण रूपमा सम्पन्न सेना परिचालनका लागि मन्त्रिपरिषद्ले सिफारिस गरेको राष्ट्रपति कार्यालयबाट जारी विज्ञप्तिमा बताइएको छ ।

आगामी मंसिर १६ गते स्थानीय तहका रिक्त स्थानमा उपनिर्वाचन हुँदैछ ।

मङ्सिर ०७,पोखरा – चितवनको साहारा सहकारी ठगी प्रकरणमा राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछानेविरुद्ध चितवनमा पनि पक्राउ पुर्जी जारी गरिएको छ।

चितवन जिल्ला अदालतका न्यायाधीश दयाराम ढकालले आज उनीसहित १० जनाविरुद्ध पक्राउका लागि प्रहरीलाईअनुमति दिएका चितवनका प्रहरी निरीक्षक लक्ष्मण केसीले जानकारी दिनुभयो ।

पक्राउ पुर्जी जारी भएकामा रविसँगै नेपाल प्रहरीका पूर्वडीआईजी छविलाल जोशीसहित १० जना छन्। उनीहरूविरुद्ध केही दिनअघि मात्रै जाहेरी परेको र सोही आधारमा जाहेरी परेका सबैविरुद्ध पक्राउ पुर्जी जारी भएको चितवन प्रहरीले जनाएको छ।

चितवनको साहारा सहकारीका २४ जना सदस्यले उनीहरूविरूद्ध पुरक जाहेरी दिएका थिए। साहाराबाट गोर्खा मिडियासहित ५ वटा कम्पनीमा रकम गएको पाइएको छ।

कार्तिक २६ ,पोखरा – सहकारी ठगी र सङ्गठित अपराध कसूरमा कास्की प्रहरीको हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेलाई प्रहरीले भोलि रुपन्देही लैजाने भएको छ ।

कात्तिक २ गते पक्राउ परेका लामिछानेलाई थप १३ दिन हिरासतमा राख्न हिजो जिल्ला अदालत कास्कीले अनुमति दिएको थियो । पोखराको सूर्यदर्शन सहकारीको रकम हिनामिनामा संलग्न रहेको आरोपमा पक्राउ परेका लामिछानेमाथि बुटवलमा रहेको सुप्रिम सहकारीको रकमसमेत हिनामिनामा संलग्न रहेको आरोप छ ।

रुपन्देही जिल्ला अदालतले बुटवलमा रहेको सुप्रिम बचत तथा ऋण सहकारी संस्थाको १४ करोड २९ लाख रुपैयाँ गोर्खा मिडिया नेटवर्क प्रालीमा लगेर खर्च गरेको कसूरमा अनुसन्धान गर्न लामिछाने, जीबी राईसहित १२ जनालाई पक्राउ गर्न कात्तिक ८ गते अनुमति दिएको थियो ।

बुटवलमा रहेको सुप्रिम सहकारीबाट दुई करोड रवि लामिछानेकै नाममा र १४ करोड २९ लाख रुपैयाँ विभिन्न व्यक्तिमार्फत गोर्खा मिडिया नेटवर्क प्रालीमा पुगेको संसदीय छानबिन विशेष समिति र प्रहरीको प्रतिवेदनमा उल्लेख छ ।

कार्तिक २५, पोखरा – सहकारीको रकम ठगी मुद्दामा पक्राउ परेका पूर्वगृहमन्त्री तथा राष्ट्रिय स्वतन्त्र पार्टी रास्वपा सभापति रवि लामिछानेलाई थप १३ दिन थुनामै राखेर अनुसन्धान गर्न अदालतले अनुमति दिएको छ।

जिल्ला अदालत कास्कीका न्यायाधीश नवराज दाहालको इजलासले रविमाथि थप १३ दिन थुनामा राखेर अनुसन्धान गर्न आदेश दिएको हो। योसहित रविको चौथोपटक म्याद थप भएको हो।

काठमाडौंबाट कात्तिक २ गते पक्राउ परेका लामिछानेमाथि सम्पत्ति शुद्धीकरण र सहकारीको रकम अपचलनमा प्रहरीले एक साथ अनुसन्धान गरिरहेको छ। यसअघि प्रहरीले लामिछानेलाई म्याद थपका लागि गत मंगलबार अदालतमा उपस्थित गराएको थियो।

प्रहरीले २५ दिन म्याद मागेकोमा न्यायाधीश चन्द्रकान्त पौडेलको इजलासले १० दिनको समय दिएको थियो। यसअघि अदालतले थप अनुसन्धानका लागि तीन पटक म्याद थप गरिसकेको छ।

लामिछानेसँगै गोर्खा मिडिया नेटवर्का अर्का सञ्चालक पूर्वडीआइजी छविलाल जोशी, जिवि राई निकट मानिएकी लिला पछाई र रामबहादुर खनाललाई पनि १० दिन हिरासतमा राख्न अनुमति दिएको थियो। लामिछानेलाई तेस्रो पटक थपिएको म्याद कात्तिक १५ गतेदेखि गणना भएर कात्तिक २४ गते सकिएको हो। हिजो शनिबार भएकाले प्रहरीले आज लामिछानेसहित तिनैजनालाई अदालत उपस्थित गराएको हो।

जिल्ला प्रहरी कार्यालय कास्कीले केन्द्रीय अनुसन्धान ब्युरो–सीआइबीको समेत साथ लिएर सम्पत्ति शुद्धीकरणमा लामिछानेको कारोबार खोजी गरिरहेको छ।