माघ १६,पोखरा – नागरिकको हकअधिकार र स्वतन्त्रताका लागि जीवन आहूति दिनेहरूको सम्मानमा बुधबार शहीद दिवस मनाइएको छ। प्रधानमन्त्री केपी शर्मा ओलीले शहीदहरूको बलिदानको प्रेरणाबाट परिवर्तनका लागि काम गर्ने सौर्य प्राप्त हुने बताउनुभएको छ ।
राष्ट्रिय शहीद दिवस २०८१ का अवसरमा सरकारले सिंहदरबार परिसरमा आयोजना गरेको मूल समारोहमा प्रधानमन्त्री ओलीले शहीदहरूले देशका लागि दिएको योगदान महत्त्वपूर्ण भएको बताउनुभयो । त्यसअघि प्रधानमन्त्री ओलीले लैनचौरमा रहेको शहीद स्मारक र शहीदगेटमा पुगेर शहीदप्रति सम्मान प्रकट गर्नुभएको थियो ।
यसैबीच शहीद सप्ताहको अन्तिम दिन आज काठमाण्डौ महानगरपालिकाले लैनचौरमा रहेको शहीद पार्कमा स्मृति सभा आयोजना गरेको छ । राणा शासकले मृत्युदण्ड दिएका चार जना शहीदसहित अन्य ज्ञात अज्ञात शहीदहरूको सम्झनामा हरेक वर्ष माघ १० देखि १६ गतेसम्मलाई शहीद सप्ताहका रूपमा मनाइँदै आएको छ ।
