फाल्गुन ०१,पोखरा – अदालतबाट विभिन्न मुद्दामा दोषी ठहर भई फरार रहेका १५३ जनालाई कास्की प्रहरीले पक्राउ गरेको छ।
पक्राउ पर्नेमा १५३ जना (१२५ जना पुरुष र २८ जना महिला) रहेका छन्।
जिल्ला प्रहरी कार्यालय कास्कीका अनुसार पक्राउ पर्नेमा चेक अनादर मुद्दामा ९६ जना, लागुऔषध मुद्दामा १४ जना, बैंकिङ कसुरमा १८ जना, अभद्र व्यवहारमा ५ जना, न्यूनस्तरको खाद्य उत्पादन बिक्री गरेकोमा २ जना, स्वास्थ्यकर्मी तथा संस्थाको सुरक्षा सम्बन्धी मुद्दामा २ जना, सवारी ज्यान मुद्दामा १ जना, कुटपिट मुद्दामा १ जना, जालसाजी मुद्दामा ४ जना, लेनदेन मुद्दामा १ जना र चोरी मुद्दामा ९ जना रहेका छन् ।
उनीहरुलाई जिल्ला प्रहरी कार्यालय कास्की र मातहतका प्रहरी कार्यालयबाट खटिएको टोलीले माघ १ गतेदेखि ३० गतेसम्मको अवधिमा पक्राउ गरेको हो।
प्रहरीका अनुसार पक्राउ परेकाहरुबाट ५ वर्ष २ महिना १६ दिन कैद सजाय र १ करोड ५२ लाख ४८ हजार ८ सय ८६ रुपैयाँ जरिवाना असुल गर्न बाँकी रहेको छ।
प्रहरीले उनीहरुलाई फैसला कार्यान्वयनको लागि अदालतमा बुझाइएको जनाएको छ ।
