भदौ १३ – युक्रेनको राजधानी किएभमा रुसले गरेको मिसाइल आक्रमणमा कम्तीमा २३ जनाको ज्यान गएको छ । जसमा चार जना बालबालिका पनि छन् । आक्रमणमा युरोपियन युनियन ईयूको कूटनीतिक कार्यालय र बेलायती काउन्सिलको कार्यालय समेत क्षतिग्रस्त भएको बीबीसीले जनाएको छ ।
युरोपेली आयोगकी प्रमुख उर्सुला भोन डेर लायनले आक्रमणलाई ‘किभमाथिको सबैभन्दा घातक प्रहार’ भन्दै कडा शब्दमा आपत्ति जनाउनुभएको छ । उहाँले ईयूको प्रतिनिधि कार्यालय नजिकै ५० मिटर भित्र दुईवटा मिसाइल खसेका दाबी गर्नुभयो । आक्रमणमा पाँचतले आवासीय भवन पूर्णरुपमा ध्वस्त भएको छ भने केही मानिस घाइते भएका खबरमा उल्लेख छ ।
युक्रेनी सेनाले रुसले झन्डै छ सय ड्रोन र ३० भन्दा बढी मिसाइल प्रहार गरेको जनाएको छ । युक्रेनका राष्ट्रपति भोलोदिमिर जेलेन्स्कीले यसलाई वार्ताको टेबुलभन्दा हतियार रोज्ने रुसको चाहना भन्दै नयाँ र कठोर प्रतिबन्ध आवश्यक भएको दोहोर्याउनु भएको छ ।
बेलायती प्रधानमन्त्री कीअर स्टार्मरले रुसी राष्ट्रपति भ्लादिमिर पुटिनलाई ‘शान्ति प्रयासलाई विफल पार्ने’ आरोप लगाउनुभयो । अरू युरोपेली नेताहरुले यसलाई शान्तिको विरुद्धको कदम भनेका छन । युक्रेनी राष्ट्रपति जेलेन्स्कीले अमेरिकी टोलीसँग न्युयोर्कमा सुरक्षा ग्यारेन्टीबारे छलफल गर्ने तयारी गरेको बताउनुभएको छ ।
