भदौ १९,पोखरा – खाजा घर सञ्चालन गरी अनैतिक गतिविधिमा संलग्न रहेको आरोपमा प्रहरीले ४ जना पक्राउ गरेको छ । अन्य ११ जना महिलाको उद्धार गरेको छ ।
जिल्ला प्रहरी कार्यालय कास्कीका अनुसार भदौ १७ गते दिउँसो पौन चार बजेको समयमा पोखरा–८ जाल्पारोडका विभिन्न खाजा घरहरूमा होहल्ला भई अनैतिक गतिविधि भई रहेको सूचनाका आधारमा उनीहरुलाई पक्राउ गरिएको हो । पक्राउ पर्नेमा चितवन घर भई जाल्पारोड बस्ने २८ वर्षकी सुनिता तामाङ, तनहुँको व्यास नगरपालिका–८ का १९ वर्षीय सुवास गुरुङ, बाग्लुङको जैमिनी नगरपालिका– ८ का २१ वर्षीय सागर थापा र शंकर थापा रहेका छन् ।
विभिन्न खाजा घरहरुबाट ११ जना महिलाहरूलाई उद्धार गरी कोपिला नेपाल संस्थामा पठाइएको कास्की प्रहरीका सूचना अधिकारी डिएसपी हरिबहादुर बस्नेतले बताउनुभयो । पक्राउ परेका ४ जनालाई जिल्ला प्रशासन कार्यालय कास्कीबाट सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसूरमा ७ दिन म्याद थप गरी अनुसन्धान प्रक्रिया अघि बढाइएको उहाले बताउनुभयो।
