कार्तिक १४,पोखरा – जेनजी आन्दोलनमा प्रहरीको पेस्तोल लुट्ने र खरिद–बिक्री गर्ने पाँच जनालाई प्रहरीले पक्राउ गरेको छ । प्रहरी वृत्त स्वयम्भूले पेस्तोल लुट्ने एक जना र त्यसको खरिद–बिक्रीमा सहभागी भएका चार जनालाई पक्राउ गरेको हो ।
आन्दोलनमा स्वयम्भू वृत्तबाट पेस्तोल लुट्ने धादिङ धुनीबेँसी घर भएका २१ वर्षीय कृष्ण गुरुङ छन्। उनले २० हजारमा सो पेस्तोल भगवान पाउ बस्ने राजन देउलालाई बिक्री गरेका थिए।
देउलाले पनि तेस्रो व्यक्तिलाई बिक्री गरेपछि प्रहरीले उनीहरूलाई पक्राउ गरेको हो। पक्राउ पर्ने अन्यमा भारतीय नागरिक अकबर खान, बिजेश्वरीका सुमित शाक्य र बानेश्वरका प्रभात मल्ल छन्। पछिल्लोपटक मल्लले सो पेस्तोल खरिद गरेका थिए।
१५ वटा गोलीसहितको पेस्तोल बरामद भएको जिल्ला प्रहरी परिसर, काठमाडौंका एसपी पवनकुमार भट्टराईले बताउनुभयो। ‘पेस्तोल विभिन्न तहमा बिक्री भएको देखिन्छ,’ एसपी भट्टराईले भन्नुभयो , ‘अनुसन्धान भइरहेको छ।’
