माघ ९ , पोखरा – पोखरामा ‘एनसेल छैटौँ टाइगर कप राष्ट्रिय तथा अन्तर्राष्ट्रिय आमन्त्रण क्लब भलिबल प्रतियोगिता’ बिहीबारदेखि भव्य रूपमा सुरु भएको छ। ‘टाइगर ग्रुप अफ पोखरा नेपाल’ को आयोजनामा सुरु भएको प्रतियोगिताको उद्घाटन गण्डकी प्रदेश प्रमुख डिल्लीराज भट्टले गर्नुभयो । प्रतियोगिताको पहिलो दिन पुरुषतर्फ विभागीय टोलीहरू ‘एपीएफ क्लब’ र ‘नेपाल आर्मी’ ले विजयी सुरुवात गरेका छन् भने महिलातर्फ ‘न्यु डायमण्ड युथ स्पोर्ट्स क्लब’ ले जित दर्ता गरेको छ। उद्घाटन खेलमा घरेलु टोली गण्डकी प्रदेश भलिबल संघ एपीएफ क्लबसँग ३–१ को सेटमा पराजित भयो। एपीएफले पहिलो सेट २५–२३ ले जिते पनि दोस्रो सेट २७–२५ ले गुमाएको थियो। त्यसपछिका तेस्रो र चौथो सेटमा क्रमशः २५–१९ र २५–१९ ले जित निकाल्दै एपीएफले खेल आफ्नो पक्षमा पार्यो। सो खेलमा एपीएफका उपेन्द्र परियार ‘प्लेयर अफ द म्याच’ बन्नुभएको छ ।
पुरुषतर्फकै अर्को खेलमा नेपाल आर्मी क्लबले पाहुना टोली माल्दिभ्स भलिबल क्लबलाई २५–१५, २५–२२ र २५–१० को सोझो सेटमा हरायो। आर्मीका सुनिल बोहोरा ‘प्लेयर अफ द म्याच’ घोषित हुँदै ‘केल्मी’ को टिसर्ट प्राप्त गर्नुभयो । महिलातर्फ भएको खेलमा ‘टिपटप न्यु डायमण्ड युथ स्पोर्ट्स क्लब’ ले २५–१३, २५–१६ र २५–८ को सेटमा सहज जित निकाल्यो। न्यु डायमण्डकी सालिना बुढा मगर सो खेलमा ‘प्लेयर अफ द म्याच’ भइन्। उद्घाटन समारोहलाई सम्बोधन गर्दै प्रदेश प्रमुख भट्टले खेलकुद स्वास्थ्यका लागि मात्र नभई राष्ट्रको अर्थतन्त्र उकास्ने महत्त्वपूर्ण माध्यम भएको बताउनुभयो । उहाले नेपालको भौगोलिक अवस्था अनुसार भलिबल सबैको पहुँचमा रहेको र यसको लोकप्रियता बढ्दै गएको उल्लेख गर्नुभयो । ‘नेपाल जस्तो भौगोलिक र सानो ठाउँमा समेत भलिबल खेल्न सकिने र सबैको पहुँचमा भएकाले यसको लोकप्रियता बढेको छ,’ भट्टले बताउनुभयो ।
‘एनसेल’ का मुख्य कार्यकारी अधिकृत (सिइओ) माइकल फोलिनले पर्यटकीय सहर पोखरामा भलिबल प्रतियोगिताको उद्घाटनमा सहभागी हुन पाउँदा गौरव महसुस भएको बताउनुभयो । उहाले नेपाली युवाले मुलुकको परिवर्तनका लागि खेलेको भूमिकाको प्रशंसा गर्दै नेपालीहरू प्रकृति र संस्कृतिका साथै मनका पनि धनी रहेको धारणा राख्नुभयो । नेपाल भलिबल संघका महासचिव रोशन श्रेष्ठले यस प्रतियोगिताले नेपाली भलिबलको विकासमा योगदान पुर्याएको भन्दै सातै प्रदेशमा खेल मैदान निर्माणका लागि संघले पहल गरिरहेको जानकारी दिनुभयो । टाइगर ग्रुपका अध्यक्ष नारायण प्रसाद शर्माले विषम परिस्थितिमा पनि प्रतियोगितालाई निरन्तरता दिँदै टाइगर कपलाई एउटा ‘ब्रान्ड’ का रूपमा स्थापित गर्न सफल भएको बताउनुभयो ।
