पौष २९, पोखरा – पृथ्वी राजमार्ग अन्तर्गत पोखराको अमरसिंह चोक र औद्योगिक क्षेत्रको बीचमा रहेको ऐतिहासिक ‘पोखरा गेट’ राजमार्ग विस्तारका क्रममा हटाइएको छ । पोखरा महानगरपालिकाका मेयर धनराज आचार्यले आफ्नो फेसबुकमा उक्त गेट हटाइएको भन्दै फोटोसमेत पोष्ट गरेका छन् । गेट साेमबार बिहान सबेरै हटाइएकाे हाे ।
गेट हटाउने प्रयासमा आएका अवरोधलाई समाधान गर्न महानगरपालिकाले केही दिनअघि सर्वपक्षीय बैठकको आयोजना गरी सकारात्मक समन्वय गरेको थियो । ‘हाम्रो पंयास भनेकै समृद्ध र व्यवस्थित पोखरा निर्माण गर्नु हो। विकास निर्माणका काममा कसैले अवरोध गर्नुहुँदैन’ मेयर आचार्यले भनेका छन, ‘पोखरा गेटलाई उपयुक्त स्थानमा पुनर्निर्माण गर्ने प्रतिबद्धता सहित, आज सुरक्षा निकाय, महानगर प्रहरी र निर्माण कम्पनीको सहकार्यमा यो काम सफलतापूर्वक सम्पन्न भएको छ। पृथ्वी राजमार्गको एकतर्फी मार्ग द्रुत गतिमा निर्माण भइरहेको छ। सबै सरोकारवालाले विकासमा सहयोग गरौं।’ उनले विकास र पूर्वाधार निर्माणका लागि सबैको सहकार्य अपरिहार्य रहेको भन्दै सहयोगी सम्पूर्णलाई धन्यवाद पनि दिएका छन् । पोखरा महानगरपालिकाले सबै सरोकारवालालाई विकास र पूर्वाधार निर्माणका लागि सहकार्य गर्न आह्वान गर्दै व्यवस्थित र समृद्ध पोखरा निर्माणमा साथ दिन आग्रह गरेको छ ।
