जेष्ठ १७,पोखरा – स्याङ्जाको पुतलीबजार नगरपालिका – ३ मजुवास्थित एक घरबाट मोबाइल चोरी गर्ने दुईजनालाई पोखराबाट प्रहरीले पक्राउ गरेको छ ।
चोरीको मोबाइलसहित स्याङ्जाको अर्जुनचौपारी गाउँपालिका – ४ घर भई कास्की पोखरा महानगरपालिका – ५ मालेपाटन बस्ने २४ वर्षीय शाहिल गुरुङ र आँधीखोला गाउँपालिका – ५ घर भई कास्की पोखरा महानगरपालिका – ५ बस्ने २१ वर्षीय पवन परियारलाई पक्राउ गरिएको जिल्ला प्रहरी कार्यालय स्याङ्जाका प्रवक्ता एवं सूचना अधिकारी प्रहरी नायब उपरीक्षक प्रशन्न राज चौधरीले जानकारी दिए ।
गत मंगलबार साँझ उनीहरूले स्याङ्जाको पुतलीबजार नगरपालिका – ३ मजुवा बस्ने चुनीकुमारी मल्लको डेरा कोठाबाट विभिन्न कम्पनीका तीन थान मोबाइल चोरेर लगेका थिए । उनीहरुको साथबाट रेड्मी कम्पनीको स्मार्ट मोबाइल एक थान, ओप्पो कम्पनीको स्मार्ट मोबाइल एक थान र भिभो कम्पनीको स्मार्ट मोबाइल एक थान बरामद भएको प्रवक्ता चौधरीले बताए ।
उनीहरूमाथि शुक्रबार चोरी सम्बन्धी मुद्दा दर्ता गरी स्याङ्जा अदालतबाट म्याद थप गरी आवश्यक अनुसन्धान अगाडि बढाइएको प्रहरीले जनाएको छ ।
