असार १३,पोखरा – केही दिनयता दिनभर चर्को घाम लाग्ने र राति पानी पर्ने क्रम चलिरहेको छ । अहिले पनि काठमाण्डौ उपत्यकासहित देशका धेरै ठाउँमा चर्को घाम लागेको छ । देशभर मनसुनको प्रभाव रहेकाले दिउँसोको तुलनामा राति धेरै पानी पर्ने मौसमविद्ले बताएका छन् ।
मनसुनको विशेषता नै दिउँसो भन्दा राति धेरै पानी पर्ने भएकाले यसलाई सामान्य रूपमा लिनुपर्ने मौसमविद् गोविन्द झाले बताउनुभएको छ । उहाँका अनुसार अहिले मनसुनी वायुको प्रभावले तराई मधेस बाहेक अन्य प्रदेशमा राम्रै पानी परिरहेको छ । तर मनसुन अझै पूर्ण रूपमा सक्रिय भएको छैन ।
बङ्गालको खाडी र दक्षिण भारतमा बलियो न्यूनचापीय प्रणाली बनिनसकेकाले पनि मनसुन केही कमजोर देखिएको हो । अबका केही दिनभित्रै मनसुन सक्रिय हुने भएकाले तराई मधेसका जिल्लामा पनि पर्याप्त पानी पर्ने मौसमविद् झाको भनाइ छ ।
अहिले कोशी प्रदेश, बागमती प्रदेश, गण्डकी प्रदेश, कर्णाली प्रदेश र सुदूरपश्चिम प्रदेशका केही ठाउँमा छिटपुटदेखि हल्का वर्षा भइरहेको छ । जल तथा मौसम पूर्वानुमान महाशाखाका अनुसार आज देशका धेरै ठाउँमा ठूलो वर्षाको अनुमान छ ।
दिउँसो कोशी प्रदेश, बागमती प्रदेश, गण्डकी प्रदेश, लुम्बिनी प्रदेश, कर्णाली प्रदेश र सुदूरपश्चिम प्रदेशका पहाडी भू–भागका एक–दुई ठाउँमा ठूलो वर्षाको सम्भावना छ । सबै प्रदेशका उच्च पहाडी तथा हिमाली भूभागका थोरै ठाउँमा हल्कादेखि मध्यम वर्षाको सम्भावना छ ।
यस्तै आज कोशी प्रदेश, बागमती प्रदेश, गण्डकी प्रदेश र लुम्बिनी प्रदेशका तराई क्षेत्र था मधेस प्रदेशका केही ठाउँमा हावाहुरीको सम्भावना रहेको महाशाखाले जनाएको छ । राति भने कोशी, गण्डकी, लुम्बिनी र सुदूरपश्चिम प्रदेशका केही ठाउँमा ठूलो वर्षाको सम्भावना छ ।
