भदौ १३,पोखरा – स्याङ्जाको गल्याङ नगरपालिका –१ राम्दीस्थित सिद्धार्थ राजमार्गमा प्रहरीले लागूऔषधसहित दुईजना युवाहरूलाई नियन्त्रणमा लिएको छ ।
प्रहरीका अनुसार भदौ १३ गते शुक्रबार दिउँसो वडा प्रहरी कार्यालय वालिङ र अस्थायी प्रहरी चौकी राम्दीबाट खटिएको टोलीले नियमित सवारीसाधन चेकजाँचका क्रममा बुटवलबाट पोखरा तर्फ जाँदै गरेको लु १ ख ८४५२ नम्बरको यात्रुबाहक बसमा चेकजाँच गर्दा लागूऔषध फेला परेको हो ।
नियन्त्रणमा परेकामध्ये कास्की पोखरा महानगरपालिका –३२ लेखनाथ बस्ने २४ वर्षीय अजय परियार र ३० वर्षीय अमृत थापा रहेका छन् । उनीहरूको साथबाट डाईजेपाम ३४ एम्पुल, नुफिन ३४ एम्पुल र फेनेरागन ३४ एम्पुल गरी जम्मा १०२ एम्पुल नियन्त्रित लागूऔषध बरामद गरिएको प्रहरीले जनाएको छ ।
बरामद लागूऔषधसहित दुवैजनालाई नियन्त्रणमा लिएर थप अनुसन्धान अघि बढाइएको जिल्ला प्रहरी कार्यालय स्याङ्जाका सूचना अधिकारी प्रहरी नायव उपरीक्षक प्रसन्न राज चौधरीले जानकारी दिनुभएको छ ।
