भदौ १६,पोखरा – कञ्चनपुरमा ठूलो पानी परेको छ । पछिल्लो १२ घण्टामा कञ्चनपुरको दोधारामा एक सय ७९ मिलिमिटर पानी परेको छ । कञ्चनपुरको जोगबुढा (मायापुरी) जलमापन केन्द्रमा जलसतहले सतर्कता तह पार गरेकाले नदी तटीय क्षेत्रमा बस्नेहरुलाई सतर्कता अपनाउन बाढी पूर्वानुमान महाशाखाले आग्रह गरेको छ ।
आज बागमती र सुदूरपश्चिम प्रदेशका एक/दुई ठाउँमा ठूलो पानी पर्ने सम्भावना रहेको मौसम पूर्वानुमान महाशाखाले जनाएको छ । महाशाखाका अनुसार कोशी र लुम्बिनी प्रदेशका केही ठाउँ तथा बाँकी पहाडी र तराई भूभागका थोरै ठाउँहरुमा मध्यम वर्षाको सम्भावना छ ।
राति सुदूरपश्चिम प्रदेशका केही ठाउँमा, बागमती, गण्डकी र लुम्बिनी प्रदेशलगायत बाँकी प्रदेशका पहाडी भूभागका थोरै ठाउँमा र बाँकी तराई भूभागका एक/दुई ठाउँमा मध्यम वर्षा हुन सक्ने महाशाखाले जनाएको छ । गएराति कञ्चनपुरसँगै कास्की र ताप्लेजुङमा ठूलो पानी परेको छ ।
यस्तै डडेलधुरा, बागलुङ, म्याग्दी, चितवन, सिन्धुपाल्चोक, दोलखा, डोटी लगायतका ठाउँमा पनि मध्यम वर्षा भएको छ ।
