भदौ २० – अमेरिकी राष्ट्रपति डोनाल्ड ट्रम्पले जापानी कारहरूमा कर घटाउने कार्यकारी आदेशमा हस्ताक्षर गर्नुभएकाे छ ।
अमेरिकी राष्ट्रपति ट्रम्पले जापानी कारहरूमा कर २७ दशमलव ५ प्रतिशतबाट घटाएर १५ प्रतिशतमा झार्ने कार्यकारी आदेशमा हस्ताक्षर गर्नुभएको बीबीसीले जनाएको छ । यो निर्णयले टोयोटा, होन्डा र निसान जस्ता कम्पनीहरूलाई ठूलो राहत दिनेछ ।
यो आदेशले जुलाईमा घोषणा गरिएको गाडी र औषधिसहित अमेरिकामा हुने झन्डै सबै जापानी निर्यातमा १५ प्रतिशत भन्सार लाग्ने सम्झौतालाई औपचारिकता दिने खबरमा उल्लेख छ । धेरै हप्तासम्म चलेको वार्तापछि यो सम्झौता भएको हो ।
ह्वाइट हाउसका अनुसार जापानले अमेरिकामा ५ सय ५० अर्ब डलर लगानी गर्न र बिस्तारै अमेरिकी सामानका लागि आफ्नो बजार खोल्न पनि सहमति जनाएको छ ।
कार्यकारी आदेशमा हस्ताक्षर भएपछि शुक्रवार टोकियोमा जापानी कार निर्माता र पार्टपुर्जा आपूर्तिकर्ताहरूको शेयर बढेको छ ।
