असार ४ पाेखरा – गण्डकी प्रदेशका आर्थिक मामिला मन्त्री जितबहादुर शेरचनले बजेट भाषणका क्रममा तथ्यांकमा भएको गम्भीर त्रुटिलाई लिएर प्रदेश सभामा माफी माग्नुभएकाे छ । पर्यटन तथा उद्योग मन्त्रालयका लागि छुट्याइएको बजेटको अंक फरक परेपछि उनले बिहीबार सदनमा उभिएर आत्मालोचना गर्नुभएकाे छ ।
पर्यटन तथा उद्योग मन्त्रालयका लागि समग्रमा ९२ करोड ४९ लाख रुपैयाँ विनियोजन भएको थियो । तर मन्त्री शेरचनले बजेट भाषण पढ्ने क्रममा उक्त मन्त्रालयका लागि २ अर्ब रुपैयाँ विनियोजन गरिएको बताउनुभएकाे छ । बजेट वक्तव्यको बुँदा नम्बर ५६ मा ९२ करोड ४९ लाख रुपैयाँ हुनुपर्नेमा अंक अन्यथा पर्न गएको उहाँले स्वीकार गर्नुभएकाे छ ।
मन्त्रीले पढेको भाषणको प्रतिमै २ अर्ब रुपैयाँ लेखिएको भए पनि बजेटको अनुसूचीमा भने ९२ करोड ४९ लाख रुपैयाँ मात्र उल्लेख थियो । ‘मन्त्रालयको तर्फबाट भएको कमजोरीलाई आत्मसात् गर्दै क्षमा चाहन्छु,’ उहाँले प्रदेश सभा बैठकमा भन्नुभयाे । उहाँले सभामुखको अनुमति लिएर असार १ गते प्रस्तुत बजेट वक्तव्यमा भएको उक्त त्रुटिबारे सदनलाई स्पष्ट पार्नुभएकाे छ ।
आर्थिक वर्ष २०८३/८४ को बजेट प्रस्तुत गर्दा भएको यो त्रुटिलाई उहाँले मन्त्रालयको कमजोरीका रुपमा लिनूभएकाे छ । उहाँले प्रदेश सभामा बजेटमाथिको छलफल प्रारम्भ गरियोस् भन्ने प्रस्ताव समेत राख्नुभएकाे छ । मन्त्री शेरचनले कमजोरी महसुस गर्दै आगामी दिनमा यस्ता प्राविधिक विषयमा सचेत रहने संकेत गर्नुभएकाे छ ।
उहाँले गण्डकी प्रदेश सरकारको राजस्व र व्ययको वार्षिक अनुमानमाथि छलफलका लागि प्रस्ताव पेश गरेपछि सदनमा बजेटमाथिको छलफल सुरु भएको छ । बजेट वक्तव्य र अनुसूचीबीच अंक नमिलेपछि सांसदहरुले प्रश्न उठाउन सक्ने ठाउँ देखेपछि मन्त्रीले सुरुमै माफी माग्नुभयाे ।
