असोज १३ , पोखरा – मनाङको चामे क्षेत्रमा थुनिएको मर्स्याङ्दी नदी ब्लास्ट गरेर खोल्ने प्रयास अझै सफल हुन सकेको छैन । मनाङका सहायक प्रमुख जिल्ला अधिकारी कृष्णप्रसाद पौडेलका अनुसार पोखराबाट ब्लास्ट गर्ने सेनाको प्राविधिक टोली हिजै चामे पुगे पनि काम अघि बढ्न सकेको छैन । ब्लास्ट गरेर थुनिएको नदी खोल्ने तयारी गरिए पनि त्यो तत्कालका लागि सम्भव नभएपछि दुई वटा उपकरण प्रयोग गरी अहिले नदी खोतल्ने काम भइरहेको उहाले बताउनुभयो ।
अविरल वर्षापछि स्थानीय घट्टेखोलामा आएको लेदोसहितको ढुङ्गा, गिट्टी, बालुवा थुप्रिएर चामे क्षेत्रमा मर्स्याङ्दी नदी थुनिएको हो । नदी थुनिएर बनेको तालबाट आंशिक रूपमा पानी बग्न थालेको छ । पौडेलका अनुसार अझै पनि ४ सय मिटर लम्बाइ र ८० मिटर चौडाइसम्म पानीको ताल बनेको छ । नदी थुनिएर बनेको ताल करिब २० फिट गहिरोसम्म हुन सक्ने उहाले बताउनुभयो । चार दिनको अविरल वर्षाका कारण मनाङका विभिन्न स्थानमा विद्युत्, टेलिफोन र सडक सञ्जाल अवरुद्ध छन् ।
