मंसिर २५,पोखरा – नेपाल प्रिमियर लिग (एनपीएल) मा निकै महत्वपूर्ण मानिएको खेलमा पोखरा एभेन्जर्सले लज्जास्पद हार बेहोरेको छ ।
आज कर्णाली याक्ससँग पोखरा सात विकेटले पराजित भएको हो । अंक तालिकामा माथि उक्लन पोखराका लागि आजको जित निकै महत्वपूर्ण थियो ।
टस जितेर पहिला ब्याटिङमा उत्रिएको पोखरा जम्मा एक सय तीन रनमै अलआउट हुन पुग्यो । पोखरा १६ दशमलव तीन ओभरमै अलआउट भएको हो ।
कर्णालीका विलियम बोसिस्टोले उत्कृष्ट बलिङ गर्दै एक्लै छ विकेट लिएका थिए । बोसिस्टोले चार ओभरमा २८ रन खर्चेर छ विकेट लिए । कप्तान सोमपाल कामी, विपिन शर्मा र युनिश सिंह ठकुरीले समान एक/एक विकेट लिए ।
पोखराका लागि दिनेश खरेलले २६, आन्द्रेस गौसले २५, रेमोन रेइफरले २० र कप्तान कुशल भुर्तेल र विपिन खत्रीले समान १०÷१० रन बनाए भने अन्यले दोहोरो अंकमा रन जोड्न सकेनन् ।
पोखराले दिएको एक सय चार रनको लक्ष्य कर्णालीले १५ ओभरमा तीन विकेट गुमाएर पूरा गरेको हो ।कर्णालीका लागि गुल्सन झाले अविजित रहँदै ४९ रन, चाडविक वाल्टनले ४२ रन योगदान गरे । १४ रनमै २ विकेट गुमाएको कर्णालीका लागि वाल्टन र गुल्सनले ६० रनको साझेदारी गरेका थिए ।
विलियम बोसिस्टो २ रनमा अविजित रहे । ओपनिङमा आएका बाबर हायत ७ रनमा आउट हुँदा देव खनालले खाता खोल्न सकेनन् । बलिङमा पोखराका विपिन खत्री, सागर ढकाल र कुशल भुर्तेलले १-१ विकेट लिए ।
यो जितसँगै पाँच खेलमा ती खेल जितेको कर्णाली छ अंक जोडेर चौथो स्थानमै छ । कर्णालीले यस जितपछि प्लेअफ पुग्ने सम्भावना बलियो बनाएको छ ।
सुदूरपश्चिम रोएल्स र चितवन राइनोजको पनि समान छ अंक भए पनि कर्णाली नेट रनरेटमा पछि छ ।
पोखराको भने चार खेलमा यो तेस्रो हार हो । चार खेलबाट पोखराको खातामा दुई अंक मात्र छ । यो हारसँगै पोखराको प्लेअपमा पुग्ने सम्भावना कमजोर बनेको छ ।
