जेष्ठ २७,अमेरिका– मेक्सिकोको सीमामा आप्रवासन नियन्त्रणका लागि गरिएको धरपकडविरुद्ध लस एञ्जलसमा भएको प्रदर्शन हिंसात्मक भएपछि ठूलो सङ्ख्यामा सुरक्षाकर्मी परिचालन गरिएको छ । केही प्रदर्शनकारी पक्राउ परेका बीबीसीले जनाएको छ ।
राष्ट्रपति डोनाल्ड ट्रम्पको निर्वासन नीतिप्रति असन्तुष्टि जनाउँदै चर्किएको प्रदर्शनले स्थानीय समुदायमा तनाव बढाएको छ । स्थिति नियन्त्रणमा लिन राष्ट्रपति ट्रम्पले २१ सय नेशनल गार्ड र सात सय मरीन सैनिक तैनाथ गर्ने आदेश दिनुभएको छ । तर, प्रदर्शनकारीलाई हिंस्रक र विद्रोहीको भीड भन्दै ट्रम्पले अभिव्यक्ति दिएपछि थप राजनीतिक विवाद सिर्जना भएको छ ।
यसैबीच क्यालिफोर्नियाका गभर्नर ग्याभिन न्यूजमले राष्ट्रपति डोनाल्ड ट्रम्प प्रशासनमाथि कडा आलोचना गर्दै बिना अनुमति लस एन्जलसमा नेशनल गार्ड तैनाथी गरिएको भन्दै अदालतमा मुद्दा दर्ता गराउनुभएको छ । राष्ट्रपति ट्रम्पले स्थिति बिगार्ने काम गरेको आरोप लगाउँदै गर्भनर न्यूजमले अवैध रूपमा नेशनल गार्ड पठाएको आरोप लगाउनुभएको हो । उहाँले यसअघि नै यो कदमलाई असंवैधानिक भन्नुभएको थियो ।
