असार १९,पोखरा – नेपाल आयल निगम लिमिटेडले इतिहासमै पहिलो पटक सतप्रतिशत स्वदेशी सीप र पूँजीमा पोखरा अन्तराष्ट्रिय विमानस्थल परिसरमा ३ हजार ६ सय किलोलिटर क्षमताको हवाइ इन्धन डिपो निर्माण सम्पन्न गरेको छ । नेपाल आयल निगमले बिहिबार पत्रकार सम्मेलन गरेर उक्त हवाइ इन्धन डिपोबारे जानकारी गराएको हो ।
इन्जिनियरिङ अध्ययन संस्थान पुलचोकको सहयोगमा भ्याट बाहेक ७५ करोडको लागतमा निर्माण सम्पन्न भएको उक्त डिपोमा १२ सय किलोलिटर क्षमताका ३ वटा ठूला ट्याङ्की निर्माण गरिएको छ । डिपो सुरक्षामा उच्च सतर्कता अपनाउनका लागि १२ सय किलोलिटर क्षमताको अलग्गै पानी ट्यांकी र आगलागीको जोखिमलाई मध्यनजर गर्दै ४ हजार लिटर क्षमताको फोम स्टोरेज ट्यांकसमेत निर्माण गरिएको छ । यसलाई फायर फाइटिङको संरचनासँग आवद्ध गरिएकाले पानीको फोहोरासँगै फोम पनि मिसिएर प्रवाह हुने र तत्कालै आगो निभाउन सकिने निगमले जनाएको छ ।
पत्रकार सम्मेलनमा इन्जिनियरिङ अध्ययन संस्थान पुल्चोकका सहायक डीन सुरज लामिछानेले वि.सं. २०८० साउन १ गतेदेखी निर्माणसुरु भएको परियोजना तोकिएको समयमै सकिएको जनाउँदै सतप्रतिशत नेपाली सीप र पूँजीमा स्थापना भएको यो डिपो ऐतिहासिक भएको बताउनुभयो ।
