साउन १२,पोखरा – आज साउन महिनाको दोस्रो सोमबार, काठमांडौको पशुपतिनाथ मन्दिर, पोखराको केदारेश्वर महादेवमणि मन्दिर, तनहुँको देवघाटधामसहित अधिकांश शिवालयहरुमा जल चढाउने र पूजा गर्नेहरुको बिहानैदेखि घुइँचो लागेको छ। आज पहेँलो बस्त्र धारण गरेका बोलबम तीर्थयात्रीहरु खालि खुट्टा पैदल हिड्दै शिवालयमा जल चढाउने गर्छन् ।
साउन महिनाको सोमबार शिवको पवित्र बार हुने भन्दै शुद्ध जल र दूध चढाएर पूजा गर्ने चलन छ । हरेक साउन महिनाको सोमबार दान, स्नानसहित शिवको पूजा गर्नाले पाप नष्ट हुने, परिवारका सदस्यको दिर्घायू हुने र सुख शान्ति मिल्ने धार्मिक विश्वास छ । यसरी पूजा गरेमा मनोकांक्षा पूरा हुने धार्मिक विश्वास छ । साउने सोमबारलाई अत्यन्त शुभ मानिन्छ । यस वर्षको साउन महिनामा चार सोमबार परेका छन् ।
यसवर्ष श्रावण महिनाको ५, १२, १९ र २६ गते सोमबार परेको छ । हरेक सोमबारमा व्रत बसेर महिला र पुरुषहरुले शिवको भक्तिपूर्वक पूजा गर्छन् । हरियो, पहेंलो र रातो पहिरनमा सजिएका व्रतालुको घुइँचो शिवालयहरुमा देख्न सकिन्छ । सोमबारको दिन राखिने ब्रतलाई सोमेश्वर व्रतको नामले जानिन्छ । यसको आफ्नो धार्मिक महत्व हुन्छ । यसदिन चन्द्रमाको पूजा पनि गरिन्छ ।
पोखरामा बिगत २४ बर्षदेखि हुदै आएको बोलबम पदयात्रा साउनको दोस्रो सोमबार अर्थात आज पनि हुँदै छ । आज भक्तजनहरुले पोखरा १ बगरको शुक्लागण्डकी गाइघाटमा पुगेर १०८ धारामा स्नान गरी सेती नदीको जल लिएर झाँकी, बाजागाजा, भजनकीर्तन गर्दै करिब आठ किमिको दूरी पैदलयात्रा गरेरै केदारेश्वर महादेवमणि मन्दिरमा जलार्पण गर्दैछन्।
