चैत ८ , पोखरा – सुडानको डार्फर क्षेत्रको एक अस्पतालमा भएको आक्रमणमा १३ बालबालिकासहित कम्तीमा ६४ जनाको ज्यान गएको छ ।
पूर्वी डार्फर राज्यको राजधानी अल–दाईनमा रहेको शिक्षण अस्पतालमा दुई महिला नर्स र एक पुरुष डाक्टरको पनि ज्यान गएको विश्व स्वास्थ्य सङ्गठनका प्रमुख डा. टेड्रोस अधानोम गेब्रेयससले सामाजिक सञ्जालमार्फत जानकारी दिनुभएको छ । आक्रमणपछि अस्पताल पूर्णरूपमा निष्क्रिय बनेको छ जसले घाइते र बिरामीहरूको उपचारमा गम्भीर सङ्कट सिर्जना गरेको छ ।
युद्धग्रस्त सुडानमा स्वास्थ्य संरचनामाथिको आक्रमण थप भयावह बन्दै गएको अन्तर्राष्ट्रिय समाचार संस्था एपीले जनाएको छ । सुडान सन् २०२३ अप्रिलदेखि गम्भीर द्वन्द्वमा फसेको छ ।
सेना र अर्धसैनिक द्रुत समर्थन बल (आरएसएफ) बीचको शक्ति सङ्घर्ष व्यापक युद्धमा परिणत भएको छ । यही द्वन्द्वकै क्रममा नागरिक पूर्वाधार, विशेषगरी स्वास्थ्य संस्थाहरू बारम्बार निशानामा पर्दै आएका खबरमा उल्लेख छ ।
अस्पतालमा भएको यस पछिल्लो आक्रमणका विषयमा दुवै पक्षले एकअर्कामाथि आरोप–प्रत्यारोप गरेका छन् । डब्ल्यूएचओको तथ्याङ्कअनुसार अहिलेसम्मको युद्धमा ४० हजार जनाभन्दा धेरैको ज्यान गइसकेको बताएको छ, तर विभिन्न सहायता संस्थाहरूले वास्तविक सङ्ख्या अझ धेरै हुन सक्ने बताएका छन् ।
डब्ल्यूएचओकाअनुसार युद्ध शुरू भएयता स्वास्थ्य संस्थामाथि भएका आक्रमणमा मात्र दुई हजारभन्दा धेरै जनाको ज्यान गएको छ ।
