असोज १५,पोखरा – पोखराको विन्ध्यवासिनी मन्दिरमा असोज १७ गते आयोजित नवदुर्गा शोभायात्रा स्थगित भएको छ ।
अविरल बर्षा भई डुवान, बाढी र पहिरोजन्य प्रकोपमा भएको जनधनको क्षतिप्रति दुःख व्यक्त गर्दै सरकारबाट राष्ट्रिय शोकको घोषणा गरेकाले शोकमा शोभायात्रा गर्न उचित नहुने भन्दै स्थगित गरिएको विन्ध्यवासिनी धार्मिक क्षेत्र विकास समितिले जनाएको छ ।
समितिद्वारा जारी विज्ञप्तिमा भनिएको छ, ‘हालै मात्र देशको विभिन्न भू-भागमा अविरल बर्षा भई डुवान, बाढी र पहिरोजन्य प्रकोपमा भएको जनधनको क्षतिप्रति दुःख व्यक्त गर्दै नेपाल सरकारबाट तीन दिन राष्ट्रिय शोकको घोषणा भएकोले यस समितिबाट यही असोज १७ गते आयोजित विन्ध्यवासिनी नवदुर्गा शोभायात्रा कार्यक्रम रद्ध भएको सूचित गरिन्छ, शोभायात्राको पूर्व तयारीमा लाग्नुभएका श्रद्धालु भक्तजन र सहयोगी संस्थामा पर्न जाने असुविधाप्रति हामी क्षमा याचना गदछौँ ।’
शोभायात्रा कार्यक्रम स्थगित भए पनि नवदुर्गा महोत्सवअन्तर्गत अन्य कार्यक्रम भने सञ्चालन हुने बताइएको छ ।
