चैत ३१,पोखरा -नागरिकमा क्षयरोग सम्बन्धी अवस्थाको पहिचान गर्न आयोजना भएका दुई वटा शिविरहरूमा झन्डै एक हजार व्यक्तिहरूको स्वास्थ्य परीक्षण गरिएको छ ।जिल्लाको कुश्मा नगरपालिकाको आयोजनामा शनिवार कुश्मा बहुमुखी क्याम्पसमा राखिएको शिविरमा पाँच सय १२ जनाको स्वास्थ्य परीक्षण गरिएको छ । प्रादेशिक क्षयरोग नियन्त्रण केन्द्र पोखराको प्राविधिक सहयोग र प्रदेश जनस्वास्थ्य कार्यालय पर्वतको समन्वयमा अत्याधुनिक एक्स–रे मेशिनद्वारा निःशुल्क छातिरोग खोज पड्ताल शिविर सम्पन्न गरिएको हो ।
कुश्माको शिविरमा परीक्षण गरिएकामध्ये छ जनालाई क्षयरोग निदानका लागि उपचार सुरु गरिएको छ भने १५ जना शङ्कास्पद क्षयरोगी भेटिएका छन् । भेटिएका शङ्कास्पद क्षयरोगीको निदानको लागी खकारको नमुना सङ्कलन गरिएको छ । जापान नेपाल स्वास्थ्य तथा क्षयरोग अनुसन्धान संस्था (जन्त्र)को सहयोगमा भएको शिविरमा एआई पद्धतिको डिजिटल पोर्टेबल आधुनिक मसिनबाट विशेषज्ञ चिकित्सक सहितको टोलीले छातीको एक्स–रे र स्वास्थ्य परीक्षण गरेको कुश्मा नगरपालिकाका प्रमुख रामचन्द्र जोशीले बताए । दिर्घरोगी, ज्येष्ठ नागरिक, क्षयरोगको सम्पर्कमा आएका जोखिमपूर्ण समूहलाई लक्षित गरी शिविरको आयोजना गरिएको उनको भनाइ छ । क्षयरोग क्यान्सरपछिको दोस्रो जटिल रोग भएकोले पनि शिविरको आयोजना गरेर त्यस्ता बिरामीहरू पत्ता लगाउनु सबैको लागि खुसीको कुरा भएको नगरप्रमुख जोशीले बताए । यस्तै शिविर शुक्रवार जिल्लाको जलजला गाउँपालिकामा पनि आयोजना गरिएको थियो। जलजला–४ स्थित लुङ्दी आधारभूत विद्यालयमा आयोजना भएको शिविरमा चार सय ३१ जनाको स्वास्थ्य परीक्षण गरिएको छ । परीक्षणमा पाँच जना व्यक्तिमा शङ्कास्पद समस्या देखिएको छ भने दुई जनालाई तत्कालै उपचार गर्नुपर्ने भएकोले उपचार सुरु गरिएको छ ।
