जेष्ठ १३,पोखरा – कास्कीकाे पोखरा महानगरपालिकालाई पूर्ण खोप सुनिश्चितता दिगोपना घोषणा गरिएको छ । महानगरपालिकाका मेयर धनराज आचार्यले पूर्ण खोप सुनिश्चितता घोषणा गर्नुभएको हो ।
सरकारको प्राथमिकता प्राप्त खोप कार्यक्रमको प्रभावकारिता र दिगोपनाका लागि हरेक वर्ष नगरभित्रका सबै बालबालिकाले तोकिएका खोपहरू प्राप्त गरेको सुनिश्चिततासहित पोखरालाई पूर्ण खोप सुनिश्चितता दिगोपना घोषणा गरिएको हो ।
मेयर आचार्यले बालबालिकाहरूको सुरक्षित भविष्य निर्माणका लागि उनीहरूले प्राप्त गर्नुपर्ने सबै प्रकारका खोपहरूसहित स्वास्थ्य सम्बन्धी सेवाहरू समयमा नै उपलब्ध गराउनु पर्ने दायित्वप्रति आफूहरू प्रतिबद्ध रहेको बताउनुभयो ।
उहाँले स्वास्थ्यसम्बन्धी अभियानहरूमा महिला सामुदायिक स्वास्थ्य स्वयंसेविकाहरूको भूमिका उल्लेखनीय हुने गरेको बताउँदै पूर्ण खोपको सुनिश्चिततामा समेत उनीहरूको महत्त्वपूर्ण योगदान रहेको बताउनुभयो ।
स्वास्थ्य महाशाखा प्रमुख भरतराज पौडेलले आफूहरूको महानगरपालिकालाई पूर्ण खोप सुनिश्चिततासहित दिगोपना घोषणाका लागि निरन्तर अभियानहरू सञ्चालन गरेको बताउनुभयो ।
विगत एक वर्षको अवधिमा ०–१५ महिनासम्मका ५ हजार ३४१ र १६–२३ महिनासम्मका ४ हजार १५० बालबालिकाहरूको घरघरमा पुगेर खोपको अवस्था यकिन गरिएको स्वास्थ्य महाशाखा प्रमुख पौडेलले बताउनुभयो ।
