जेष्ठ ११,पोखरा – सवारी ज्यान कसूर मुद्दाका फरार प्रतिवादीलाई प्रहरीले दश वर्षपछि पक्राउ गरेको छ । प्रहरीले उदयपुर जिल्लाको त्रियुगा नगरपालिका वडा नं. ३ का ३९ वर्षिय सुरेश कुमार माझीलाई घरबाटै पक्राउ गरेको हो ।
बागलुङ बडिगाडको खरर्बाङबाट काठेखोलाको अक्षतेतर्फ आउँदै गर्दा माझीले चलाएको ट्याक्टर गलकोट नगरपालिका वडा नं. १ दुदिलाभाटीमा दुर्घटना हुँदा त्यसमा सवार सुर्खेत जिल्लाको शाटाखानी गाउँपालिका वडा नं. ७ का १७ वर्षिय रामबहादुर सार्की गंभीर घाइते भएका थियो । घाइते सार्कीको उपचारको क्रममा मृत्यु भएपछि चालक माझी फरार थिए । सार्कीको मृत्युपछि सवारी ज्यान कसूर घटनामा लामो समयदेखि फरार माझीलाई जिल्ला प्रहरी कार्यालय बागलुङले उदयपुर प्रहरीको सहयोगमा पक्राउ गरी बागलुङ ल्याईएको प्रहरी निरीक्षक केशव थापाले जानकारी दिनुभयो । पक्राउ माझीलाई सवारी ज्यान कसूर मुद्दामा अनुसन्धान गर्न जिल्ला अदालत बागलुङबाट पाँच दिनको म्याद गरिएको छ ।
