बैशाख ५ पाेखरा – पोखरा महानगरपालिका वडा नं. २७ स्थित तालचोकबाट प्रहरीले जुवा खेलिरहेको अवस्थामा ९ जनालाई पक्राउ गरेको छ । तालचोकको हिमालयटोलमा जुवातास खेलिरहेको भन्ने विशेष सूचनाका आधारमा खटिएको प्रहरी टोलीले उनीहरूलाई नगद र विदेशी मुद्रासहित नियन्त्रणमा लिएको हो । जिल्ला प्रहरी कार्यालय कास्कीका बिहीबार साँझ उनीहरुलाई इलाका प्रहरी कार्यालय शिसुवाबाट खटिएको टोलीले जुवा खेलीरहेको अवस्थामा पक्राउ गरेको हो ।
प्रहरीले उनीहरुको साथबाट ६७ हजार ५ सय ६० रुपैयाँ नगद बरामद गरेको छ । यस्तै, उनीहरूको साथबाट ११२ अमेरिकी डलर, २४० अस्ट्रेलियन डलर र ४ बुक तास समेत फेला परेको जिल्ला प्रहरी कार्यालय कास्कीले जनाएको छ ।पक्राउ परेका ९ जनालाई नै हिरासतमा राखेर थप अनुसन्धान प्रक्रिया अगाडि बढाइएको छ । उनीहरूमाथि सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसूर अन्तर्गत जुवा खेल्न वा सट्टेबाजी गर्न नहुने मुद्दामा जिल्ला प्रशासन कार्यालय कास्कीबाट ६ दिनको म्याद थप गरी अनुसन्धान अगाडि बढाएको कास्की प्रहरीले जनाएको छ ।
