भदौ ३१ , पोखरा – रसुवाको चिलिमे हाइड्रोपावरको सुरुङमा फसेका ८ जना मध्ये ४ जनाको शव भेटिएको छ । बुधबार गोताखोरहरूले ३ जनाको शव र एउटा मानव अङ्ग फेला पारेका हुन् । नेपाली सेना, सशस्त्र र भारतीय टनेल विशेषज्ञहरूले चिलिमेमा फसेकाहरूको खोजी तीव्र बनाउँदै आएका थिए । सुरुङभित्रबाट लगातार पानी आएपछि गोताखोर टोलीले १३० मिटर भित्र प्रवेश गरेर शव निकालेको सैनिक प्रवक्ता (सहायकरथी) राजाराम बस्नेतले जानकारी दिनुभयो ।
चीनको ल्हेन्दे खोला हुँदै आएको भिषण बाढीका कारण रसुवा र नुवाकोटका ११ वटा जलविद्युत आयोजना प्रभावित भएका छन् । स्वतन्त्र ऊर्जा उत्पादकहरूको संस्था (इप्पान)का अनुसार ११ वटै आयोजनाको टनेलमा मानिसहरू फसेका छन्। नेपाली सेनाको नेतृत्वमा अहिले ६ वटा आयोजनामा खोज तथा उद्धारको काम भइरहेको छ । हालसम्म सुरुङबाट ९ वटा शव निकालिएको छ । रसुवाको गोसाईंकुण्ड गाउँपालिका–५ रोङ्गास्थित रसुवा भोटेकोशी जलविद्युत आयोजनाको टनेलमा २ जनाको शव भेटिएको थियो । ड्रोन प्रयोग गरेर खोज तथा उद्धार गर्दा दुई जनाको शव भेटिएको हो।
लाङटाङ खोला जलविद्युत आयोजनामा पनि यसअघि २ जनाको शव भेटिएको थियो । चिलिमेमा एउटा खुट्टाको भाग सहित ४ जनाको शव भेटिएको हो । त्रिशूली–३ ए मा १ जनाको शव भेटिएको थियो । नेपाली सेना, सशस्त्र प्रहरी बल, विदेशबाट आएका टनेल विशेषज्ञ र आयोजनाका प्राविधिक सहितका उद्धारकर्मीहरूले अहिलेसम्म टनेलबाट ३ जनालाई सकुशल उद्धार गरेका छन् । उद्धारकर्मीहरूले भदौ १९ मा त्रिशूली–३ ए जलविद्युत आयोजनाको सुरुङबाट सञ्जय साह र कबिर महर्जनको जीवितै उद्धार गरेका थिए।
भदौ २० मा माथिल्लो त्रिशूली–१ जलविद्युत आयोजनाको सुरुङको २२५ मिटर भित्र सुरुङबाट चिनियाँ नागरिक लुआइतोलाई सकुशल उद्धार गरिएको थियो । रसुवागढी जलविद्युत आयोजनाबाट सुरुमा दुई जनालाई हेलिकप्टरमार्फत उद्धार गरिएको थियो । चिलिमे जलविद्युत आयोजनामा उद्धारकर्मीहरूले पावरहाउस क्षेत्रमा खोजी तीव्र पारेका छन्। २२ मेगावाटको चिलिमे जलविद्युत आयोजनामा उद्धारका लागी सेनाले स्याफ्रुबेँशीदेखी चिलिमेको टनेलसम्म हेभी उपकरण लैजान बाटो बनाएका थिए।
