असोज १० , पोखरा – बंगालको खाडीमा उत्पन्न न्यून चापीय प्रणालीको प्रभाव पूर्वी नेपालमा क्रमशः कम हुँदै गए पनि पश्चिम नेपालमा भने भोलिसम्म कायमै रहने भएको छ । मौसम विज्ञान विभागका अनुसार, विशेष गरी गण्डकी, लुम्बिनी, कर्णाली र सुदूरपश्चिम प्रदेशका अधिकांश ठाउँमा भोलि दिउँसोसम्म मध्यमदेखि मुसलधारे वर्षाको सम्भावना छ ।
पछिल्लो ६ घण्टामा कोशी र बागमतीमा हल्का वर्षामात्र भएको छ भने मधेश प्रदेशमा वर्षा भएको छैन । लगातार तीन दिनदेखिको वर्षाका कारण देशका विभिन्न ठाउँमा बाढी र पहिरोले ठूलो क्षति पुर्याएको छ भने एक जनाको ज्यान गएको छ । लगातारको वर्षापछि बागलुङको ताराखोला गाउँपालिका वडा नम्बर ५ मा पहिरोले घर पुरिँदा ५९ वर्षीय मनबहादुर रोकाको ज्यान गएको छ । नारायणी नदीको बाढी पसेर पश्चिम नवलपरासीको सुस्ता गाउँपालिका–५ जलमग्न भएपछि सशस्त्र प्रहरीले २९ जनाको सकुशल उद्धार गरेको छ ।
त्यस्तै, पूर्वी नवलपरासीको कावासोतीमा रहेको अमलटारी क्षेत्रमा नारायणीकै बाढी पस्दा दर्जनौँ घर डुबानमा परेका छन् । गण्डक ब्यारेजमा पानीको बहाव ३ लाख ७६ हजार ८०० क्युसेक पुगेर खतराको तह नजिक पुगेपछि ब्यारेजका सबै ढोका खोलिएका छन् । यस्तै, सप्तरीको तिलाठी कोइलाडीमा कोशी नदीको बाढी बस्तीमा पस्दा १७ घरपरिवार विस्थापित भई कोशी बाँधमा आश्रय लिइरहेका छन् । कालीगण्डकी नदीमा बहाव बढेपछि गुल्मीको रिडीका ७ घरपरिवारलाई सुरक्षित ठाउँमा सारिएको छ । वर्षाका कारण भौतिक संरचनामा पनि क्षति पुगेको छ ।
गोरखाको सहिद लखन गाउँपालिकाको राइनस बजार नजिकै खसेको पहिरोले २५ घरधुरी उच्च जोखिममा परेका छन् । वर्षाकै कारण कास्कीको घान्द्रुकमा रहेको प्रहरी चौकीको भवनमा पहिरोले क्षति पुर्याएको छ । सुर्खेतमा रुख र बिजुलीका पोल ढल्दा विद्युत् सेवा अवरुद्ध भएको छ । सुब्बाकुना–रामघाट र लम्की–बाबियाचौर ३३ केभी प्रसारण लाइनमा ठूलो क्षति पुगेकाले तत्काल विद्युत् सुचारु गर्न नसकिने प्राधिकरणले जनाएको छ ।
मौसमविद् रोजन लामिछानेले पूर्वी र पश्चिम दुवै भेगमा पहिरो र बाढीको जोखिम रहेकाले अत्यावश्यक अवस्थामा बाहेक यात्रा नगर्न र यात्रा गर्नै परे प्रहरीसँग बाटोको अवस्था बुझ्न आग्रह गर्नुभएको छ । पर्सि सोमबारदेखि भने देशभर मौसममा सुधार आउने भएकाले त्यसपछि मात्र नियमित काम तथा कृषिका योजना बनाउन सुझाव दिइएको छ ।
