असोज ११ , पोखरा – निरन्तरको वर्षाले पोखराको मध्यभाग भएर बग्ने सेती नदीको रामघाटमा ताल बनेको छ । रामघाटमा साँघुरो निकासका कारण पानी सहजै बग्न नपाउँदा ताल बन्न पुगेको हो । रामघाटमा ताल बनेपछि उच्च सावधानीसहित निगरानी बढाएको कास्की प्रशासनले जनाएको छ । साथै प्रशासनले नदी तटीय क्षेत्रका बासिन्दालाई सचेत रहन आग्रह पनि गरेको छ ।
रामघाटमा पानीको सतह बढ्दै जाँदा नदी किनारमा रहेका पोखरामहानगरको वडा–९ र ११ का सुकुमवासी बस्ती, रामघाट, शान्तिघाट तथा बौद्ध गुम्बाका शवदाह गृहहरूसमेत जलमग्न भई जोखिममा परेका छन् । सुकुमवासी बस्तीमा सुरक्षाकर्मी परिचालन गरी सतकर्ता अपनाइएको र प्रहरीले निरन्तर निगरानी गरिरहेको कास्कीका सहायक प्रमुख जिल्ला अधिकारी चित्राङ्गत बरालले जानकारी दिनुभयो । हिजो बेलुका प्रमुख जिल्ला अधिकारी कुमानसिंह गुरुङको नेतृत्वमा जिल्ला सुरक्षा समितिका पदाधिकारीले रामघाट वरपरको क्षेत्रको स्थलगत अनुगमन गरेका छन् ।
