sambridhaonline

पर्वत, १८ कात्तिक
प्रतिनिधिसभा र प्रदेशसभा निर्वाचनको माहोल जति तात्दै गएको छ त्यति नै गठबन्धनका उम्मेदवारप्रतिको जनलहर बढ्दैगएको छ । पछिल्लो समय नेकपा एमाले पार्टी छोडेर काङ्ग्रेसमा प्रवेश गर्नेको माहोल गाउँगाउँमा तात्दै गएको छ । मंशीर ४ गते हुने निर्वाचनमा नेपाली काङ्ग्रेसको तर्फबाट प्रतिनिधिसभामा प्रभावशाली नेता अर्जुनप्रसाद जोशी र प्रदेश १ मा नेकपा माओबादीका युवा नेता सुदिप कुँवर उम्मेदवार हुनुहुन्छ । प्रदेशसभा २ मा सामाजिक अभियन्ता एवं उद्यमी ऋषिकेश तिवारी हुनुहुन्छ । तिनैजना नेता प्रभावशाली नेता उम्मेदवार भएकाले नेकपा एमाले लगायत साना दलका कार्यकर्ता गठबन्धनका दल र प्रमुख घटक नेपाली काङ्ग्रेसमा प्रवेश गर्न थालेका हुन ।

यसक्रममा कुश्मा नगरपालिका ८ का नेकपा एमालेका पार्टीको मुल नेतृत्वमा रहेका नेताहरु नेपाली काङ्ग्रेसमा प्रवेश हुनुभएको छ । प्रवेश गर्नेमा नेकपा एमाले चुवाका कार्यबाहक पार्टी अध्यक्ष हरि नारायण गिरी, नेकपा एमाले चुवाका सचिव रामचन्द्र परियार, ने क पा एमाले कुस्मा नगर सदस्य गणेश नेपाली,नेकपा एमाले चुवाको दलित मुक्ति समाजका अध्यक्ष उत्तम परियार,नेकपा एमालेमा आबद्ध मिलन परियार, टीकाराम पोख्रेल नेपाली काङ्ग्रेसमा प्रवेश गर्नुभएको छ । पार्टी प्रवेश गर्ने सबैलाई नेपाली काङ्ग्रेसका नेता एबम प्रतिनिधिसभाका उम्मेदवार अर्जुनप्रसाद जोशी, प्रदेश क का सभापति राजकुमार क्षेत्रीले नेपाली काङ्ग्रेसमा स्वागत गर्नुभयो ।

पर्वतमा गठबन्धनको जित सुनिश्चित भएको भन्दै गठबन्धनको पक्षमा गोलबन्द हुन जोशीले आव्हान गर्नुभयो । उहाँले जिल्लाभरका जनताले अहिले देश लाई माया गर्ने र विकास गर्ने शक्ति पाँच दलिय गठबन्धन नै भएको भन्दै प्रत्यक्ष र समानुपातिक तर्फका उम्मेदवारलाई मत दिन आग्रह गर्नुभयो ।
चुवाका एमाले नेताहरु लाई पार्टीमा स्वागत गर्दै एमाले पार्टी बेलैमा छोडेर परिवर्तित हुने बाटोमा लागेकोमा स्वागत र धन्यबाद ब्यक्त गर्नुभयो । प्रदेश सभा १ को सदस्य पदका उम्मेदवार नेकपा माओबादी केन्द्रका केन्द्रीय सदस्य सुदिप कुँवरले काङ्ग्रेस, माओबादी, नेकपा एकिकृत समाजबादी, जनमोर्चा, नेकमा समाजबादी लगायतका पाँच दलका कार्यकर्ता एकाआपसमा नङ र मासुको जस्तै सम्बन्धमा जोडिएकोले सबै कार्यकर्ताले दायाँबायाँ नगरि मतदान गर्न आव्हान गर्नुभयो । गठबन्धनका उम्मेदवारले हार्दा निरंकुश, अहंकारी र प्रतिगमनकारीले जित्ने भएकाले विशेष सचेत र सजग हुन जरुरी रहेको कुँवरले बताउनुभयो । माओबादीले इमान्दार भएर गठबन्धनका उम्मेदवार लाई भोट हाल्ने र अन्य पार्टीका कार्यकर्ता पनि गम्भिर भएर आफ्ना उम्मेदवार जिताउन लाग्नुपर्ने उहाँले बताउनुभयो । गठबन्धनका उम्मेदवारले चुवाका बिभिन्न बस्ती र कुश्मा नगरपालिका १० पिपलटारीमा घरैघरै पुगेर भेटघाट गरेका छन । पिपलटारीबासीहरुले सधै एमालेको दास बनेर नबसि अब गठबन्धन लाई मत दिने सोचाइमा रहेको बताएका थिए ।

नेपाल प्रेस यूनियन पर्वतले आगामी प्रतिनिधिसभा र प्रदेशसभा निर्वाचनमा उम्मेदवारले गाउँगाउँमा नागरिक सामू गरेका प्रतिबद्धता र नागरिकका अपेक्षाका बारेमा सूचना प्रवाह गर्ने उदेश्यले सूचना केन्द्र ‘ न्यूज डेस्क’ सञ्चालन गरेको छ । यूनियनले गठबन्धन दलमा आवद्ध सबै पत्रकार संगठनहरु लाई समेत सहभागी गराई हरेक वडा र बस्तीमा हुने चुनावी गतिविधि सहज र सरल रुपमा प्रचार गर्ने गरि सूचना केन्द्र स्थापना गरेको हो ।

सोमबार एक कार्यक्रमकाबिच प्रेस यूनियनमा आबद्ध पत्रकारहरुको उपस्थितिमा ‘डेस्क’ बाट समाचार सामग्रीहरु उत्पादनको सुरुवात गरिएको हो । निर्वाचनको बेलामा आम नागरिकलाई तथ्यपूर्ण सूचना दिएर उपयुक्त उम्मेदवारलाई मतदान गर्ने वातावरण सिर्जना गर्नका लागि सदरमुकाम कुश्मा स्थित आचार्यचोकमा प्रेस यूनियनको कार्यालय समेत स्थापना गरेर ‘डेस्क’ राखिएको हो ।

प्रेस यूनियन पर्वतका अध्यक्ष उत्तमप्रसाद अधिकारीका अनुसार ‘डेस्क’ बाट आम नागरिकले भोगिरहेको साझा समस्या, नागरिकले अपेक्षा गरेका सामाजिक परिवर्तनका विषय तथा पूर्वाधार निर्माणको क्रम लगायत जिल्लाको समग्र अवस्थाका बारेमा खोजी गर्ने र तिनलाई सञ्चार माध्यमबाट प्रकाशन गर्ने काम हुने छन् । प्रेस यूनियनको आज बसेको बैठकले डेक्समा रहने प्रतिनिधी लाई जिम्मेवारी पनि तोकेको छ । डेस्क बाहिर रहेर स्थानीय स्तरमा भइरहेका क्रियाकलापहरुको रिपोर्टिङ गर्ने गरी पनि जिम्मेवारी बाँडफाँट गरिएको यूनियनका सचिव सुमनजंग थापाले बताए ।

‘न्यूज डेस्क’ का संयोजक ओमप्रसाद घायलले जनताका अपेक्षा सम्बन्धित तहसम्म पु¥याउने बताउँदै जनताको अनुभूतिका कुरा बाहिर ल्याउने काम ‘डेस्क’ बाट हुने बताए । भएकाले जनजीविकालाई सहजीकरण गर्न सहयोग पुग्ने गरी प्रेस यूनियनले समाचार सामग्रीहरु तयार पार्ने उनको भनाई छ ।