Featured News

असार २७ , पोखरा – पोखरामा गरिएको प्रदुषण परीक्षणमा जाँच गरिएका ४० वटा सवारीसाधनमध्ये २२ वटा सवारी तोकिएको प्रदुषण मापदण्डमा असफल भएका छन्। अत्यधिक धुवाँ उत्सर्जन गरेको पाइएपछि ती सवारीलाई आवश्यक कारबाहीका लागि यातायात व्यवस्था कार्यालय कास्की पठाइएको छ।

जिल्ला ट्राफिक कार्यालय कास्की र यातायात व्यवस्था कार्यालय कास्कीको संयुक्त टोलीले शनिबार पोखराको न्यूरोड क्षेत्रमा प्रदुषण परीक्षण गर्ने विशेष उपकरणसहित सिटी बस तथा अन्य डिजेल इन्जिनबाट सञ्चालन हुने सवारीसाधनको अनुगमन गरेको थियो।

अनुगमनका क्रममा ४० वटा सवारीसाधनको प्रदुषण परीक्षण गर्दा २२ वटा सवारीले तोकिएको मापदण्डभन्दा बढी धुवाँ उत्सर्जन गरेको फेला परेको जिल्ला ट्राफिक कार्यालय कास्कीले जनाएको छ।
प्रदुषण परीक्षणमा असफल भएका सवारीसाधनलाई आवश्यक कानुनी प्रक्रिया अघि बढाउन यातायात व्यवस्था कार्यालय कास्की पठाइएको छ।

ट्राफिक प्रहरीले वायु प्रदुषण न्यूनीकरण, वातावरण संरक्षण तथा सडकमा सञ्चालन हुने सवारीसाधनलाई मापदण्डअनुसार सञ्चालन गराउने उद्देश्यले यस्ता अनुगमनलाई निरन्तरता दिइने जनाएको छ। साथै सवारीधनी तथा चालकलाई समयमै सवारीसाधनको मर्मतसम्भार गरी प्रदुषण मापदण्ड पालना गर्न आग्रह गरिएको छ।

असार २० , पोखरा – प्रहरीले जुवातास खेलिरहेको अवस्थामा बागलुङ नगरपालिका–३ चिप्लेटीबाट सात जनालाई पक्राउ गरेको छ ।

जिल्ला प्रहरी कार्यालय बागलुङका सुचना अधिकारी रामेश्वर त्वातिका अनुसार शुक्रवार दिउँसोे जुवातास खेलिरहेको अवस्थामा उनीहरुलाई पक्राउ गरिएको हो ।

प्रहरी निरीक्षक चिरञ्जिवी अधिकारीको नेतृत्वमा खटिएको प्रहरी टोलीले जुवातास खेलिरहेको घरमा छापा मारी घरधनी मुक्तबहादुर किसान, सोही ठेगानाका पदमबहादुर किसान, प्रेमबहादुर किसान, दीपक रुचाल, शुक्र आले र बागलुङ नगरपालिका-६ का श्यामबहादुर परियार तथा बागलुङ नगरपालिका-८ का कृष्ण खड्कालाई नियन्त्रणमा लिइएको हो ।

उनीहरूको साथबाट नगद रु. २० हजार ८३५ रुपैयाँ र १०६ पत्ती तास बरामद गरिएको प्रहरीले जनाएको छ ।

असार २० , पोखरा – कास्कीको पोखरा महानगरपालिका क्षेत्रभित्र जिल्ला प्रशासन कार्यालयले बजार अनुगमनमा तीव्रता दिएको छ । सहायक प्रमुख जिल्ला अधिकारी चित्रांगत बराल नेतृत्वको संयुक्त टोलीले १५ असारदेखि १९ असारसम्म बजार अनुगमन गरेको हो । टोलीले महानगरभित्रका अस्पतालका चमेनागृह, विद्यालयका चमेनागृह, होटल, रेष्टुरेन्ट, डिपार्टमेन्टल स्टोर र किराना पसलहरुमा निरीक्षण गरेको छ । अनुगमनका क्रममा गुणस्तरहीन र म्याद गुज्रिएका खाद्य सामग्री बिक्री गर्ने ८ वटा व्यवसायलाई ५०÷५० हजार रुपैयाँका दरले जरिवाना गरिएको छ ।

उपभोक्ताको स्वास्थ्यमा खेलवाड गरेको र बजार नियम उल्लंघन गरेको पाइएपछि प्रशासनले कडा कदम चालेको हो । अनुगमनका क्रममा मूल्यसूची नराखेको, व्याच नम्बर र उत्पादन मिति नखुलेका वस्तु बेचेको पाइएको छ । ‘विभिन्न बजार क्षेत्रको स्थलगत अनुगमनको क्रममा मूल्यसूची नराखेको, व्याच नम्बर, उत्पादन मिति, प्रयोग योग्य मिति र लेबल नभएका वस्तुहरू बिक्री वितरण गरेको पाइएको छ,’ प्रशासनले जारी गरेको प्रेस विज्ञप्तिमा उल्लेख छ । टोलीले सरसफाइमा ध्यान नदिने र व्यवसाय नवीकरण नगर्ने पसलहरुलाई समेत सचेत गराएको छ ।प्रशासनले १५ असारमा पोखरा ६ बैदामस्थित श्रीकृष्ण माडवारी रेष्टुरेन्टलाई ५० हजार रुपैयाँ जरिवाना ग¥यो । सोही दिन पश्चिमाञ्चल क्षेत्रीय अस्पतालको चमेनागृह चलाउने सुनिल क्यान्टिन तथा खुद्रा कपडा पसललाई पनि ५० हजार रुपैयाँ जरिवाना गरियो । उनीहरुले जरिवाना रकम बैंकमा दाखिला गरिसकेका छन् ।

मनिपाल शिक्षण अस्पतालको चमेनागृह सञ्चालन गर्ने न्युट्री किचन प्रालिलाई पनि ५० हजार रुपैयाँ जरिवाना भएको छ । न्युट्री किचनबाट ८ पिस भेज प्याट्रिज, १७ पिस चिकेन प्याट्रिज र १६ पिस बेकरीजन्य सामग्री नष्ट गरिएको छ । यी सामग्रीको बजार मूल्य ३ हजार ८ सय ६० रुपैयाँ रहेको थियो । मनिपाल अस्पतालकै अर्को चमेनागृह सर्वगुण फुड्स एण्ड किचनलाई पनि ५० हजार रुपैयाँ जरिवाना गरिएको छ । त्यहाँबाट २ हजार रुपैयाँ बराबरको ४७ पिस बेकरीजन्य सामग्री बरामद गरी नष्ट गरिएको छ । १६ असारमा बैदामस्थित गुड डे हस्पिटालिटी प्रालिलाई ५० हजार रुपैयाँ जरिवाना गरियो । सो ठाउँबाट ८ हजार ७ सय ४५ रुपैयाँ बराबरको १ सय १३ पिस बेकरीजन्य सामग्री नष्ट गरिएको छ । यद्यपि यो कम्पनीले जरिवाना रकम अझै बैंकमा जम्मा गरेको छैन ।

असार १९ , पोखरा – पोखरा महानगरपालिका २६ र २७ को सिमानामा पर्ने गढुवा खोलाको पुलमुनि एक युवक मृत फेला परेका छन् । मृतक लेखनाथ नगर बस सेवामा कार्यरत सहचालक रेसम रहेको खुलेको छ ।

अन्दाजी २५ वर्षीय रेसम उदयपुरका स्थायी बासिन्दा हुन् । उनी हाल पोखरा २६ रविमहल आसपास बस्दै आएका थिए । उनलाई धेरैले ‘गाईघाटे’ भनेर चिन्ने गर्थे । डाँडाको नाक प्रहरी बिट अगाडि रहेको पुलमुनि उनको शव भेटिएको हो ।

प्रहरीले शवलाई पोस्टमार्टमका लागि गण्डकी अस्पताल पठाएको छ । यो घटना बिहीबार साँझ भएको हुनसक्ने प्रहरीको प्रारम्भिक अनुमान छ । घटनाबारे थप अनुसन्धान भइरहेको प्रहरीले बताएको छ ।

असार १८ , पोखरा – पोखराका सडकमा प्राविधिक अवस्था कमजोर रहेका तथा अत्याधिक धुवा फाल्दै सञ्चालन हुने नगर बसबारे सर्वसाधारणबाट व्यापक गुनासो आएपछि जिल्ला ट्राफिक कार्यालय कास्कीले त्यस्ता सवारीमाथि कारबाही थालेको छ।

कार्यालयका अनुसार अवस्था ठिक नभएका नगर बसहरू सञ्चालन भइरहेको भन्दै कार्यालयमा निरन्तर जनगुनासो प्राप्त हुनुका साथै कारबाहीको माग गर्दै विभिन्न सामाजिक सञ्जालमा समेत पोस्टहरू सार्वजनिक भएका थिए।

सोही गुनासोका आधारमा अत्याधिक धुवा फाल्दै सञ्चालन भइरहेको एक नगर बसलाई ट्राफिक प्रहरीले नियन्त्रणमा लिई आवश्यक कानुनी कारबाही गरेको जनाएको छ। साथै, सवारी साधनको प्राविधिक अवस्था मापदण्डअनुसार सुधार गर्न लगाई आवश्यक प्रक्रिया पूरा भएपछि मात्र छोडिएको कार्यालयले जनाएको छ।

जिल्ला ट्राफिक कार्यालय कास्कीले वातावरण प्रदूषण न्यूनीकरण तथा सुरक्षित र व्यवस्थित सवारी सञ्चालनका लागि यस्ता अनुगमन र कारबाहीलाई निरन्तरता दिइने जनाएको छ। साथै, प्राविधिक अवस्था कमजोर भएका तथा अत्याधिक धुवा फाल्ने सवारीसाधन सञ्चालन नगर्न सम्बन्धित व्यवसायी तथा चालकलाई अनुरोध गरेको छ।

असार १६ पाेखरा – आज, भोलि र पर्सि देशका केही ठाउँमा ठूलो पानी पर्ने सम्भावना छ । मौसम पूर्वानुमान महाशाखाका अनुसार आज र भोलि कोशी, मधेश, बागमती, गण्डकी, लुम्बिनी र सुदूरपश्चिम प्रदेशका केही ठाउँमा मेघ गर्जन वा चट्याङसहित मुसलधारे वर्षाको सम्भावना छ ।

थोरै ठाउँमा आरीघोप्टे वर्षाको समेत सम्भावना रहेको महाशाखाले जनाएको छ । यस्तै पर्सि पनि पहाडी भेगका एक, दुई ठाउँमा मुसलधारे पानी पर्ने सम्भावना छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले पूर्वी तथा पश्चिम तराईमा अलि बढी सावधानी अपनाउन अनुरोध गरेको छ । प्राधिकरणका अनुसार अबका केही दिन अकस्मात् बाढी, पहिरो, कटान, गेग्रान बहाव, शहरी तथा तराई क्षेत्रमा डुबानको जोखिम रहन्छ ।

प्राधिकरणले वर्षा र बाढीबारे जानकारी लिन ११५५, विपदमा मद्दत माग्न ११४९, नेपाल प्रहरी १०० र सशस्त्र प्रहरी बल नेपालको १११४ हटलाइन नम्बरमा आवश्यक परेको अवस्थामा तत्काल फोन गर्न पनि आग्रह गरेको छ ।

यसपालि नेपालमा मनसुन जुन १९ तारिख अर्थात् असार ५ गते भित्रिएको हो । तर अझैसम्म पुरै देशभर फैलिएको छैन । औसत मितिभन्दा ६ दिनपछि भित्रिएको मनसुन प्रणालीले पर्याप्त वर्षा गराउन नसकेको बेला मुसलधारे वर्षा हुन लागेको र आवश्यक सावधानी अपनाउन सम्बन्धित निकायले सूचित गरेका छन् ।

मनसुन बाँकी भागमा पनि फैलिने क्रममा छ । यस्तो बेला ठुलो वर्षासँगै कतैकतै अचानक बाढी आउन सक्ने सम्भावना पनि भएकाले सतर्क रहन आग्रह गरेको प्राधिकरणले जनाएको छ ।