पौष २१,पोखरा – जिल्ला प्रशासन कार्यालय कास्कीले एकै परिवारका तीन जनालाई आमाको नामबाट नेपाली नागरिकता प्रदान गरेको छ । कास्कीको अन्नपूर्ण गाउँपालिका–८ दाङसिङकी स्थायी बासिन्दा निरुता नेपालीका छोराद्वय सुजन नेपाली र दिनेश नेपाली तथा छोरी सुस्मिता नेपालीलाई आमाको नामबाट नेपाली नागरिकताको प्रमाणपत्र प्रदान गरिएको हो ।
सहायक प्रमुख जिल्ला अधिकारी चित्राङ्गत बरालका अनुसार आइतबार उनीहरुलाई नेपाली नागरिकता दिइएको हो । अन्नपूर्ण गाउँपालिकामा गत मंसिर १२ मा जिल्ला प्रशासन कार्यालय कास्कीद्वारा सञ्चालित स्थानीय तहमा शान्तिसुरक्षा, अपराध नियन्त्रण र सेवा प्रवाहसम्बन्धी सचेतनामूलक अन्तरक्रियाका क्रममा निरुताका सन्तानको जन्मदर्ता प्रमाणपत्र तथा नेपाली नागरिकता प्राप्तिमा समस्या भएको विषय उठेको थियो । निरुताले नै प्रमुख जिल्ला अधिकारी रुद्रादेवी शर्मा समक्ष छोराछोरीको जन्मदर्ता नहुँदा नेपाली नागरिकताको प्रमाणपत्र प्राप्तीमा समस्या भएको बताएकी थिइन् ।
उक्त विषयमा सम्बन्धित स्थानीय तहसँगको समन्वय एवम् जिल्ला प्रशासन कार्यालयको सहजीकरणमा उनीहरूको जन्मदर्ता गराई आमाको नामबाट नेपाली नागरिकता प्रदान गरी समस्याको समाधान गरिएको सहायक प्रमुख जिल्ला अधिकारी बरालले जानकारी दिए । निरुता नेपालीको नेपालको पूर्व खोटाङ घर बताउने विक्रम राईसँग सम्बन्ध कायम भई निज सन्तानहरुको जन्म भएको प्रशासनले जनाएको छ ।
निज विक्रम राई श्रीमती र ४ सन्तानलाई छाडी वेपत्ता भएपश्चात निजहरुको बुबाको पहिचान हुने कुनै कागजात र प्रमाण पेस हुन नसकेका अवस्थामा अन्नपूर्ण गाउँपालिका–८ बाट गरिएको जन्मदर्ता प्रमाणपत्र, वडा कार्यालयको सिफारिस, वडाको मुचुल्का, प्रहरी मुचुल्कासमेतका आधारमा नागरिकता ऐन, नियमावली र नागरिकता वितरण कार्यविधि बमोजिमका प्रमाण तथा तथ्यका आधारमा उनीहरूलाई आमाको नामबाट नागरिकताको प्रमाणपत्र प्रदान गरिएको कास्की जिल्ला प्रशासनले जनाएको छ । नेपाल सरकारले बनाएको ससोधित नेपाली नागरिकता कानुनको कार्यान्वयन गर्ने क्रममा प्रशासनले उनीहरुलाई बंशजजको आधारमा नागरिकता प्रदान गरेको हो ।
