216
असोज-०५,कास्की – कास्कीको पोखरा महानगरपालिकामा गएको भदौ पहिलो हप्तायता डेङ्गी सङ्क्रमण छ गुणाले बढेको छ । भदौको पहिलो हप्तासम्ममा सात सयको आसपास रहेको डेङ्गी सङ्क्रमितको सङ्ख्या बढेर चार हजार चार सय ३३ जना पुगेको महानगरको स्वास्थ्य महाशाखाले जनाएको छ ।महाशाखाका जनस्वास्थ्य निरीक्षक राजेन्द्र रेग्मीले सङ्क्रमितको सङ्ख्या तीन हजार एक सय पुग्न नदिने लक्ष्य लिएकोमा लक्ष्य पूरा गर्न नसकिएको बताउनुभयो । गएको वर्ष पोखरामा तीन हजार ७० जनामा डेङ्गी सङ्क्रमण पुष्टि भएको थियो ।
कात्तिक महिनासम्म सङ्क्रमणको जोखिम रहने भएकाले यो वर्ष सङ्क्रमितको सङ्ख्या अझै बढ्नसक्ने देखिएको रेग्मीले बताउनुभयो । यस वर्ष डेङ्गी सङ्क्रमणबाट पोखरामा तीन जनाको ज्यान गइसकेको छ ।
