फाल्गुन १५,पोखरा – मृत जनावरहरु किनबेच गर्ने दुईजनालाई स्याङ्जा प्रहरीले पक्राउ गरेको छ । रेविजको लक्षण देखिएका मृत जनावरहरु किनबेच गर्ने स्याङ्जाको वालिङ् का दुईजनालाई पक्राउ गरिएको हो ।
पक्राउ पर्नेमा वालिङ् नगरपालिका – ५ का ५५ वर्षीय राजेन्द्र बहादुर केसी र ८ का ५० वर्षीय शंसुदिन मिया रहेका छन् ।
केसीले संक्रामक रोग रेवीजको लक्षण देखिएका मृत घर पालुवा जनावरहरु एउटा भैंसी, एउटा भैंसीको पाडो, एउटा बाख्रा र एउटा बाख्राको पाठी बेचेका थिए । मियाले रेवीज रोगको लक्षण देखिएका घर पालुवा जनावरहरु खरिद गरेर वालिङ्बाट भीरकोटतर्फ लैजाँदै गरेको विशेष सूचनाका आधारमा उनले प्रयोग गरेको सवारीसाधनसहित प्रहरीले बरामद गरेको डिएसपी पौडेलले बताए ।
उनले बरामद जनावरहरुमा वालिङ् नगरपालिकाको पशु प्राविधिक टोलीले परिक्षण गर्दा संक्रामक रोग रेवीजको लक्षण देखिएको पुष्टि भएको जानकारी दिए । संक्रामक रोगको लक्षण पुष्टि भएसङ्गै दुईजनालाई पक्राउ गरिएको प्रहरीले जनाएको छ ।
पक्राउ परेका दुईजनालाई संक्रामक रोग फैलाउन नहुने कसुर मुद्दामा जिल्ला अदालत स्याङ्जाबाट म्याद थप गरेर आवश्यक अनुसन्धान अगाडि बढाइएको प्रहरीले जनाएको छ ।
