साउन ३०,पोखरा – स्याङ्जाको फेदिखोला गाउँपालिका –१, चारघरेकी देवी कुमारी गुरुङको घरबाट चोरी भएको भनिएको सुनमध्ये घरमै भेटिएको छ भने सुनका गरगहना चोरी भएको भनी झुट्टा उजुरी दिएको आरोपमा एक महिलामाथि जिल्ला प्रहरी कार्यालय स्याङ्जाले कारबाही प्रक्रिया समेत अघि बढाएको छ ।
फेदिखोला गाउँपालिका –१ चारघरेकी देवी कुमारी गुरुङले गत साउन २७ गते दिउँसो कोही नभएको समयमा आफ्नै घरको ताला फुटाई चार थान सुनका गरगहना चोरी भएको दाबी गर्दै जिल्ला प्रहरी कार्यालयमा उजुरी दर्ता गरेकी थिइन् ।
प्राप्त सूचनाको आधारमा तत्काल खटिएको प्रहरी टोलीले अनुसन्धान गर्दा घरको ताला फुटाइएको कुनै प्रमाण नपाएको र हराएको भनिएका सुनमध्ये तीन थान साउन २८ गते गुरुङकै घरभित्र फेला पारेको जिल्ला प्रहरी कार्यालयका सूचना अधिकारी प्रहरी नायव उपरीक्षक प्रसन्न राज चौधरीले जानकारी दिनुभयो ।
साथै, घरमै राखिएको गरगहना चोरी भएको भनी झुटो विवरण दिएको विषयमा गुरुङमाथि कानून बमोजिम आवश्यक अनुसन्धान भैरहेको डिएसपी चौधरीले बताउनुभयो ।
बाँकी गहनाबारे आवश्यक अनुसन्धान भइरहेको प्रहरीले जनाएको छ । साथै, आफ्नो हक पुग्ने सम्पत्ति चोरी भएको भनी झुटा उजुरी नगर्न प्रहरीले आग्रह गरेको छ ।
