पौष ५ – आफ्ना दुई सैनिक र एक नागरिक मारिएको घटनापछि अमेरिकाले सिरियामा इस्लामिक स्टेट (आईस) लक्षित व्यापक हवाई तथा जमिनबाट आक्रमण गरेको छ । अमेरिकी रक्षा अधिकारीहरूका अनुसार हिजो साँझ शुरु भएको कारबाहीमा ७० भन्दा धेरै ठाउँमा १०० भन्दा धेरै सटीक हतियार प्रयोग गरिएको अल जजिराले जनाएको छ ।
एक हप्ताअघि सिरियाको पाल्माइरा शहरमा एक सैन्य अड्डामा भएको आक्रमणमा आयोवा नेसनल गार्डका दुई सैनिक र एक नागरिकको ज्यान गएको थियो । घटनापछि अमेरिकी राष्ट्रपति डोनाल्ड ट्रम्पले कडा प्रतिकार गर्ने चेतावनी दिएका दिनुभएको थियो ।
यद्यपि, आक्रमणको जिम्मेवारी कसैले नलिए पनि अमेरिकी अधिकारीहरूले आईएस संलग्न रहेको आशंका गरेका छन् । राष्ट्रपति ट्रम्पले सामाजिक सञ्जालमार्फत अमेरिकाले ‘आतङ्ककारीविरुद्ध गम्भीर बदला’ लिइरहेको बताउनुभएको छ ।
रक्षा मन्त्री पिट हेगसेथले यो कारबाहीलाई ‘अपरेशन हकआइक स्ट्राइक’ नाम दिँदै अमेरिकामाथि आक्रमण गर्ने जो–कोहीलाई कडा जवाफ दिइने चेतावनी दिनुभएको छ । सिरियामा इस्लामिक स्टेटविरुद्धको अमेरिकी अभियान सन् २०१४ देखि चलिरहेको छ । सन् २०१९ मा आईएस समूहको अन्तिम किल्ला ढले पनि साना समूहहरु अझै सक्रिय रहेको अमेरिकाको भनाइ छ ।
