असार २८ , पोखरा – इरानले हर्मुज जलमार्ग अनिश्चितकालका लागि बन्द गर्ने घोषणा गरेपछि अमेरिकाले इरानमाथि नयाँ चरणको सैन्य आक्रमण गरेको छ ।
अमेरिकी रक्षा मन्त्री पीट हेगसेथले सामाजिक सञ्जालमार्फत ‘इरानले गलत निर्णय गरेको र अब त्यसको मूल्य चुकाउनुपर्ने भन्दै अमेरिकाले थप कारबाही गर्ने चेतावनी दिनुभएको छ । इरानले अर्को सूचना जारी नभएसम्म हर्मुज जलमार्ग बन्द गरिएको घोषणा गरेको छ ।
साथै इरानले अमेरिकाले कुनै सैन्य कदम चाले त्यसको कडा प्रतिकार गर्ने र मध्यपूर्वमा रहेका नयाँ अमेरिकी सैन्य अखडासमेत निशानामा पार्ने चेतावनी दिएको छ । केही दिन अघि अमेरिकी आक्रमणमा इरानका १७ जनाको ज्यान गएको र ११५ जना घाइते भएका इरानको दाबी छ । त्यसको जवाफमा इरानले खाडी क्षेत्रमा रहेका अमेरिकी साझेदार राष्ट्रका अखडामा मिसाइल आक्रमण गरेको छ ।
दुवै देशबीच वार्ताको प्रक्रिया भने पूर्ण रूपमा रोकिएको छैन । मध्यस्थकर्तामार्फत अमेरिकाले इरानलाई हर्मुज जलमार्ग अन्तर्राष्ट्रिय जहाजका लागि खुला रहेको सार्वजनिक घोषणा गर्न र व्यावसायिक जहाजमाथिको आक्रमण रोक्न आग्रह गरिएको छ । यसैबीच, इरानका नयाँ सर्वोच्च नेता मोज्तबा खामेनीले आफ्नो पहिलो सार्वजनिक सम्बोधन गर्दै पूर्व सर्वोच्च नेता अलि खामेनीको हत्याको बदला अवश्य लिइने बताएपछि अमेरिकी राष्ट्रपति डोनाल्ड ट्रम्पले आफूविरुद्ध कुनै पनि हत्या प्रयास भए अमेरिकाले इरानमाथि पूर्ण रूपमा विनाशकारी जवाफ दिने चेतावनी दिनुभएको छ ।
हर्मुज विश्वको सबैभन्दा महत्त्वपूर्ण ऊर्जा व्यापार मार्गमध्ये एक हो । विश्वको ठूलो हिस्सा कच्चा तेल र प्राकृतिक ग्यास यही मार्ग हुँदै अन्तर्राष्ट्रिय बजारमा पुग्ने भएकाले यसको बन्दले विश्व ऊर्जा आपूर्ति, तेलको मूल्य र अन्तर्राष्ट्रिय व्यापारमा गम्भीर असर पर्ने चिन्ता बढेको छ ।
