समाज

असार २० , पोखरा – कास्कीको पोखरा महानगरपालिका क्षेत्रभित्र जिल्ला प्रशासन कार्यालयले बजार अनुगमनमा तीव्रता दिएको छ । सहायक प्रमुख जिल्ला अधिकारी चित्रांगत बराल नेतृत्वको संयुक्त टोलीले १५ असारदेखि १९ असारसम्म बजार अनुगमन गरेको हो । टोलीले महानगरभित्रका अस्पतालका चमेनागृह, विद्यालयका चमेनागृह, होटल, रेष्टुरेन्ट, डिपार्टमेन्टल स्टोर र किराना पसलहरुमा निरीक्षण गरेको छ । अनुगमनका क्रममा गुणस्तरहीन र म्याद गुज्रिएका खाद्य सामग्री बिक्री गर्ने ८ वटा व्यवसायलाई ५०÷५० हजार रुपैयाँका दरले जरिवाना गरिएको छ ।

उपभोक्ताको स्वास्थ्यमा खेलवाड गरेको र बजार नियम उल्लंघन गरेको पाइएपछि प्रशासनले कडा कदम चालेको हो । अनुगमनका क्रममा मूल्यसूची नराखेको, व्याच नम्बर र उत्पादन मिति नखुलेका वस्तु बेचेको पाइएको छ । ‘विभिन्न बजार क्षेत्रको स्थलगत अनुगमनको क्रममा मूल्यसूची नराखेको, व्याच नम्बर, उत्पादन मिति, प्रयोग योग्य मिति र लेबल नभएका वस्तुहरू बिक्री वितरण गरेको पाइएको छ,’ प्रशासनले जारी गरेको प्रेस विज्ञप्तिमा उल्लेख छ । टोलीले सरसफाइमा ध्यान नदिने र व्यवसाय नवीकरण नगर्ने पसलहरुलाई समेत सचेत गराएको छ ।प्रशासनले १५ असारमा पोखरा ६ बैदामस्थित श्रीकृष्ण माडवारी रेष्टुरेन्टलाई ५० हजार रुपैयाँ जरिवाना ग¥यो । सोही दिन पश्चिमाञ्चल क्षेत्रीय अस्पतालको चमेनागृह चलाउने सुनिल क्यान्टिन तथा खुद्रा कपडा पसललाई पनि ५० हजार रुपैयाँ जरिवाना गरियो । उनीहरुले जरिवाना रकम बैंकमा दाखिला गरिसकेका छन् ।

मनिपाल शिक्षण अस्पतालको चमेनागृह सञ्चालन गर्ने न्युट्री किचन प्रालिलाई पनि ५० हजार रुपैयाँ जरिवाना भएको छ । न्युट्री किचनबाट ८ पिस भेज प्याट्रिज, १७ पिस चिकेन प्याट्रिज र १६ पिस बेकरीजन्य सामग्री नष्ट गरिएको छ । यी सामग्रीको बजार मूल्य ३ हजार ८ सय ६० रुपैयाँ रहेको थियो । मनिपाल अस्पतालकै अर्को चमेनागृह सर्वगुण फुड्स एण्ड किचनलाई पनि ५० हजार रुपैयाँ जरिवाना गरिएको छ । त्यहाँबाट २ हजार रुपैयाँ बराबरको ४७ पिस बेकरीजन्य सामग्री बरामद गरी नष्ट गरिएको छ । १६ असारमा बैदामस्थित गुड डे हस्पिटालिटी प्रालिलाई ५० हजार रुपैयाँ जरिवाना गरियो । सो ठाउँबाट ८ हजार ७ सय ४५ रुपैयाँ बराबरको १ सय १३ पिस बेकरीजन्य सामग्री नष्ट गरिएको छ । यद्यपि यो कम्पनीले जरिवाना रकम अझै बैंकमा जम्मा गरेको छैन ।

असार १९ , पोखरा – पोखरा महानगरपालिका २६ र २७ को सिमानामा पर्ने गढुवा खोलाको पुलमुनि एक युवक मृत फेला परेका छन् । मृतक लेखनाथ नगर बस सेवामा कार्यरत सहचालक रेसम रहेको खुलेको छ ।

अन्दाजी २५ वर्षीय रेसम उदयपुरका स्थायी बासिन्दा हुन् । उनी हाल पोखरा २६ रविमहल आसपास बस्दै आएका थिए । उनलाई धेरैले ‘गाईघाटे’ भनेर चिन्ने गर्थे । डाँडाको नाक प्रहरी बिट अगाडि रहेको पुलमुनि उनको शव भेटिएको हो ।

प्रहरीले शवलाई पोस्टमार्टमका लागि गण्डकी अस्पताल पठाएको छ । यो घटना बिहीबार साँझ भएको हुनसक्ने प्रहरीको प्रारम्भिक अनुमान छ । घटनाबारे थप अनुसन्धान भइरहेको प्रहरीले बताएको छ ।

असार १८ , पोखरा – पोखराका सडकमा प्राविधिक अवस्था कमजोर रहेका तथा अत्याधिक धुवा फाल्दै सञ्चालन हुने नगर बसबारे सर्वसाधारणबाट व्यापक गुनासो आएपछि जिल्ला ट्राफिक कार्यालय कास्कीले त्यस्ता सवारीमाथि कारबाही थालेको छ।

कार्यालयका अनुसार अवस्था ठिक नभएका नगर बसहरू सञ्चालन भइरहेको भन्दै कार्यालयमा निरन्तर जनगुनासो प्राप्त हुनुका साथै कारबाहीको माग गर्दै विभिन्न सामाजिक सञ्जालमा समेत पोस्टहरू सार्वजनिक भएका थिए।

सोही गुनासोका आधारमा अत्याधिक धुवा फाल्दै सञ्चालन भइरहेको एक नगर बसलाई ट्राफिक प्रहरीले नियन्त्रणमा लिई आवश्यक कानुनी कारबाही गरेको जनाएको छ। साथै, सवारी साधनको प्राविधिक अवस्था मापदण्डअनुसार सुधार गर्न लगाई आवश्यक प्रक्रिया पूरा भएपछि मात्र छोडिएको कार्यालयले जनाएको छ।

जिल्ला ट्राफिक कार्यालय कास्कीले वातावरण प्रदूषण न्यूनीकरण तथा सुरक्षित र व्यवस्थित सवारी सञ्चालनका लागि यस्ता अनुगमन र कारबाहीलाई निरन्तरता दिइने जनाएको छ। साथै, प्राविधिक अवस्था कमजोर भएका तथा अत्याधिक धुवा फाल्ने सवारीसाधन सञ्चालन नगर्न सम्बन्धित व्यवसायी तथा चालकलाई अनुरोध गरेको छ।

असार १६ पाेखरा – आज, भोलि र पर्सि देशका केही ठाउँमा ठूलो पानी पर्ने सम्भावना छ । मौसम पूर्वानुमान महाशाखाका अनुसार आज र भोलि कोशी, मधेश, बागमती, गण्डकी, लुम्बिनी र सुदूरपश्चिम प्रदेशका केही ठाउँमा मेघ गर्जन वा चट्याङसहित मुसलधारे वर्षाको सम्भावना छ ।

थोरै ठाउँमा आरीघोप्टे वर्षाको समेत सम्भावना रहेको महाशाखाले जनाएको छ । यस्तै पर्सि पनि पहाडी भेगका एक, दुई ठाउँमा मुसलधारे पानी पर्ने सम्भावना छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले पूर्वी तथा पश्चिम तराईमा अलि बढी सावधानी अपनाउन अनुरोध गरेको छ । प्राधिकरणका अनुसार अबका केही दिन अकस्मात् बाढी, पहिरो, कटान, गेग्रान बहाव, शहरी तथा तराई क्षेत्रमा डुबानको जोखिम रहन्छ ।

प्राधिकरणले वर्षा र बाढीबारे जानकारी लिन ११५५, विपदमा मद्दत माग्न ११४९, नेपाल प्रहरी १०० र सशस्त्र प्रहरी बल नेपालको १११४ हटलाइन नम्बरमा आवश्यक परेको अवस्थामा तत्काल फोन गर्न पनि आग्रह गरेको छ ।

यसपालि नेपालमा मनसुन जुन १९ तारिख अर्थात् असार ५ गते भित्रिएको हो । तर अझैसम्म पुरै देशभर फैलिएको छैन । औसत मितिभन्दा ६ दिनपछि भित्रिएको मनसुन प्रणालीले पर्याप्त वर्षा गराउन नसकेको बेला मुसलधारे वर्षा हुन लागेको र आवश्यक सावधानी अपनाउन सम्बन्धित निकायले सूचित गरेका छन् ।

मनसुन बाँकी भागमा पनि फैलिने क्रममा छ । यस्तो बेला ठुलो वर्षासँगै कतैकतै अचानक बाढी आउन सक्ने सम्भावना पनि भएकाले सतर्क रहन आग्रह गरेको प्राधिकरणले जनाएको छ ।

असार १५ पाेखरा – ‘जलवायुमैत्री प्रविधि, धानमा आत्मनिर्भरता र समृद्धि’ भन्ने मूल नारासहित आज २३ औँ राष्ट्रिय धान दिवस तथा रोपाइँ महोत्सव विभिन्न कार्यक्रम गरी मनाइँदैछ । कृषि विभागका महानिर्देशक तथा २३ औँ राष्ट्रिय धान दिवस तथा रोपाइँ महोत्सव मूल समारोह समितिका अध्यक्ष समेत रहेका प्रकाशकुमार सन्जेलका अनुसार दिवसले खाद्य तथा पोषण सुरक्षामा धानको महत्व तथा धान प्रवद्र्धनमा सरकारका प्रयासलाई आम नागरिकसम्म पु¥याउन सहयोग पुग्नेछ ।

विभागका अनुसार नेपालमा ४१ लाख ३१ हजार किसान घरधुरीमध्ये २७ लाख ६५ हजार घरधुरी धान खेतीमा संलग्न छन् भने कुल खेतीयोग्य जमिनको ५४ प्रतिशत क्षेत्रमा धान खेती हुने गरेको छ । कृषि क्षेत्रको कुल गार्हस्थ उत्पादनमा धानको झण्डै १३ प्रतिशत तथा कुल खाद्यान्न उत्पादनमा ५० प्रतिशत योगदान रहेको उल्लेख गरिएको छ ।

पछिल्ला पाँच वर्षमा धानको उत्पादकत्व प्रतिहेक्टर ३.८० मेट्रिकटनबाट बढेर ४.१९ मेट्रिकटन पुगेको छ । आर्थिक वर्ष २०८१/८२ मा १४ लाख २० हजार ६३६ हेक्टर क्षेत्रफलमा खेती गरी ५९ लाख ५५ हजार ४७६ मेट्रिकटन धान उत्पादन भएको विभागले जनाएको छ ।

यद्यपि, वार्षिक झण्डै ७० लाख मेट्रिकटन धान आवश्यक पर्ने भएकाले हाल झण्डै १० लाख मेट्रिकटन धान अपुग रहेको छ । जलवायु परिवर्तनका कारण हुने सुक्खा, बाढी तथा डुबानजस्ता प्राकृतिक विपद्ले धान उत्पादनमा चुनौती थपिरहेको भन्दै सरकारले जलवायु अनुकूल कृषि प्रविधिको अनुसन्धान, विकास र विस्तारलाई प्राथमिकता दिएको जनाएको छ ।

असार १३ , पोखरा – पृथ्वी राजमार्गअन्तर्गत तनहुँको आँबुखैरेनी गाउँपालिका–२ मार्कीचोकमा कारको ठक्करबाट दुई जना बालबालिकाको ज्यान गएको छ ।

भारतमा दर्ता भएको कारले ठक्कर दिँदा आँबुखैरेनी गाउँपालिका–२ का ६ वर्षीया सायना थापा र ५ वर्षीय उलियम थापाको ज्यान गएको जिल्ला प्रहरी कार्यालय तनहुँका प्रहरी नायब उपरीक्षक द्वारिकाप्रसाद घिमिरेले जानकारी दिनुभयो ।

हिजो बेलुका विद्यालयबाट घर फर्किरहेको अवस्थामा उनीहरूलाई कारले ठक्कर दिएको थियो । ठक्करबाट गम्भीर घाइते भएका सायना र उलियमको उपचारका क्रममा चितवन आज बिहान ज्यान गएको हो ।

असार १२ पाेखरा – राष्ट्रिय स्वतन्त्र पार्टी (रास्वपा) को निर्वाचित केन्द्रीय सदस्यमा झन्डै आधा महिला प्रतिनिधित्व भएको छ । निर्वाचित ९९ सदस्यीय केन्द्रीय सदस्यमा ४९ जना महिला उम्मेदवार विजयी भएका हुन् । यो प्रतिशतका हिसाबले ४९.४९ प्रतिशत हो ।

बिहीबार भएको निर्वाचनमा ३८४ जना उम्मेदवार थिए । राति सार्वजनिक भएको मतपरिणम अनुसार केन्द्रीय समितिमा महिला र पुरुष हाराहारीमै निर्वाचित भए । रास्वपाका ९९ केन्द्रीय सदस्य निर्वाचनबाट तय हुने विधानको व्यवस्था छ । बाँकी ५१ सदस्य सभापतिले मनोनित गर्नेछन् । बागमती प्रदेशतर्फ सबै निर्वाचित केन्द्रीय सदस्य सबै महिला छन् । नेपालको संविधान र राजनीतिक दलसम्बन्धी ऐनले पार्टीका हरेक कमिटीमा कम्तीमा ३३ प्रतिशत महिला प्रतिनिधित्व अनिवार्य गरेको छ।

भूगोलतर्फ ७५ प्रतिशतभन्दा बढी र खुला प्रतिस्पर्धामा समेत ४० प्रतिशत हाराहारी महिलाहरू निर्वाचित भएर आउनुले पार्टीको नीति निर्माणको केन्द्रमा महिला नेतृत्वको बलियो हस्तक्षेप स्थापित भएको सङ्केत गर्छ। रास्वपाको पूर्ण केन्द्रीय समिति १५८ सदस्यीय हुने व्यवस्था रहेकाले अब बाँकी ५१ जना मनोनीत गर्ने क्रममा पार्टीले समग्र जातीय र क्षेत्रीय समावेशिताको सन्तुलनलाई कसरी मिलाउँछ भन्ने चासोको विषय बनेको छ।

असार १० , पोखरा – फेवातालमा पौडी खेल्ने क्रममा डुबेर बेपत्ता भएका युवकको शव फेला परेको छ । सशस्त्र प्रहरीको गोताखोर टोलीले मंगलबार राति करिब ९ः१० बजे शव फेला पारेको हो । मृतक पोखरा महानगरपालिका १५ रामबजार बस्ने १९ वर्षीय अमर थापा क्षेत्री हुन् । उनी साँझ ७ बजेतिर पोखरा ६ स्थित फेवातालमा पौडी खेल्ने क्रममा डुबेका थिए ।

घटनाको जानकारी पाएलगत्तै सशस्त्र प्रहरी बल नेपाल नम्बर २४ कालिका गण कास्कीबाट गोताखोर सहितको टोली परिचालन भयो । टोलीले तालमा खोजी गर्ने क्रममा करिब २५ फिट गहिराइबाट अमरको शव बाहिर निकालेको सशस्त्र प्रहरीका सहायक प्रवक्ता डिएसपी शैलेन्द्र थापाले यसबारे जानकारी दिनुभयो।

असार ८ , पोखरा – चितवनको भरतपुर महानगरपालिका-१५ मा ट्रकमा स्कुटर ठोक्किँदा २ जनाको मृत्यु भएको छ । चितवनको भरतपुर महानगरपालिका-१५ स्थित अतिथि पार्टी प्यालेस नजिक सडकमा ना५ ख ५८१६ नम्बरको ट्रकमा बा.प्र-०६-००४ प ७२४८ नम्बरको स्कुटर ठोक्किएर दुर्घटना भएको थियो ।

सोमबार बिहान भएको दुर्घटनामा स्कुटरमा सवार २ जनाको मृत्यु भएको छ । मृत्यु हुनेहरूमा स्कुटर चालक सोही महानगरपालिका-२६ दिव्यनगरका २२ वर्षीय अशोक भण्डारी र स्कुटरमा सवार सोही महानगरपालिका-२० बस्ने लमजुङ घर भएका १९ वर्षीय राजीव गुरूङ रहेका छन्

दुर्घटनामा गम्भीर घाइते भएका उनीहरूको भरतपुर सरकारी अस्पतालमा उपचारको क्रममा मृत्यु भएको प्रहरीले जनाएको छ । ट्रक चालकलाई प्रहरीले नियन्त्रणमा लिएर दुर्घटनाबारे थप अनुसन्धान गरिरहेको छ ।

असार ७ , पोखरा – राष्ट्रिय स्वतन्त्र पार्टी (रास्वपा) ले प्रथम राष्ट्रिय महाधिवेशनका निम्ति चार हजार २११ प्रतिनिधि निर्धारण गरेको छ । सात प्रदेश, प्रवास, समायोजन र मनोनयनबाट उनीहरू चुनिएका हुन् ।

पार्टी सचिवालयका सङ्गठन विभाग सचिव शङ्कर श्रेष्ठका अनुसार ३३ देशका प्रवास सम्पर्क विभागबाट १७० जना, विधानअनुसार पार्टी सभापतिबाट १३८ जना मनोनयन भइसकेका छन् भने समूहगत रूपमा पार्टी प्रवेश गरेकालाई १९२ जनालाई चयन गरिएको छ ।

कोशी प्रदेशबाट ३६४, मधेशबाट ६३०, बागमतीबाट ७९४, लुम्बिनीबाट ६२१, गण्डकीबाट ४५४, कर्णालीबाट ३४३ र सुदूरपश्चिमबाट ५०५ जना प्रतिनिधि महाधिवेशनमा सहभागी हुने छन् ।

महाधिवेशन प्रतिनिधिका रूपमा पालिका सभापति, क्षेत्रीय सभापति र उपसभापति, जिल्ला सभापतिसहित पाँच जना प्रतिनिधि रहने व्यवस्था गरिएको छ । प्रदेश समितिका सबै सदस्यहरू, प्रदेशस्तरीय विभाग, अनुशासन आयोग र सल्लाहकार परिषद्का पदाधिकारी पनि प्रतिनिधि भएका छन् ।

यसैगरी, सङ्घीय नेतृत्व मञ्चका सबै केन्द्रीय सदस्य, केन्द्रमा रहेका ३८ वटा विभागबाट ११–११ जनाका दरले सदस्य तथा केन्द्रीय निर्वाचन आयोग, अनुशासन आयोग र लेखा आयोगबाट ११–११ जनाको प्रतिनिधित्व भएको छ ।

प्रत्येक गाउँपालिकाबाट एक जना, नगरपालिकाबाट दुई जना, उपमहानगरपालिकाबाट तीन जना र महानगरपालिकाबाट चार जना प्रतिनिधि भएका छन् ।

प्रदेश सम्पर्क विभागबाट तीन–तीन जना र जिल्ला सम्पर्क विभागबाट एक–एक जना प्रतिनिधि हुने व्यवस्था छ । गत प्रतिनिधिसभा निर्वाचनमा रास्वपाका तर्फबाट पराजित तथा समानुपातिक सूचीका व्यक्ति पनि प्रतिनिधि भएका छन् ।

साथै, २०७९ सालको प्रतिनिधिसभा निर्वाचनमा पराजित समानुपातिक सूचीका र पार्टीमा सक्रिय व्यक्तिलाई पनि प्रतिनिधि बनाइएको छ । केन्द्रीय समितिमा नरहेका प्रतिनिधिसभा सदस्य पनि महाधिवेशन प्रतिनिधि भएका छन् ।